Serenus Sammonicus, Medicinalis, XVI. Tussi et choleribus medendis
| 1 | noxia si cholerum penitus saevire venena |
| 2 | perspicies, cocta lactucae fronde levabis, |
| 3 | proderit et caules adsumere saepe madentes. |
| 4 | Interdum fauces tussi quatiuntur atroci: |
| 5 | alia tum sumis decocta et melle peruncta, |
| 6 | semina vel raphani permixto dulcia melle. |
| 7 | Aut si fraxinea semen de fronde revellis, |
| 8 | interiora vora, vetitus contingere dente. |
| 9 | Ovum melle teres domitum ferventibus undis |
| 10 | marrubiumve potens: haec faucibus optima sumes |
| 11 | frenabisque gravem facili medicamine tussim. |