Serenus Sammonicus, Medicinalis, IX. Umoribus et perfrictionibus sedandis
| 1 | saepe ita pervadit vis frigoris ac tenet artus, |
| 2 | ut vix quaesito medicamine pulsa recedat. |
| 3 | Si ranam ex oleo decoxeris, abice carnem, |
| 4 | membra fove. Parili ratione rigorem |
| 5 | urticae semen perceptaque frigora vincit. |
| 6 | Et cervina potest mulcere medulla rigorem. |
| 7 | Decoctum raphani semen cum melle vorabis. |
| 8 | Sive fel ursinum tepefacta dilue lympha: |
| 9 | proderit hoc potu; seu cassis ostrea testis |
| 10 | usta dabit cinerem, qui pro sale sumptus in escis |
| 11 | decutiet gelidum calefacto vertice virus. |
| 12 | Nonnullus liquidum sugit mulsumque sinapi |
| 13 | palatoque agitat pariter retinensque vomensque. |
| 14 | Alia nonnulli mandunt oleive liquore |
| 15 | perfundunt calido cerebrum nasique latebras. |
| 16 | Quidam lactucae credunt prodesse sapores. |
| 17 | Curandi modus hic et suavis et utilis idem est. |