Serenus Sammonicus, Medicinalis, VII. Phrenesi et capiti purgando
| 1 | ex vitio cerebri phrenesis furiosa movetur |
| 2 | amissasque refert frendens amentia vires, |
| 3 | sive calens febris iactatos exedit artus |
| 4 | sive meri gustus seu frigoris efficit aura. |
| 5 | Convenit calidis pecudum pulmonibus apte |
| 6 | tempora languentis medica redimire corona. |
| 7 | Inlotis etiam lanis suffire memento |
| 8 | cerritum; saepe horrendi medicantur odores. |
| 9 | Non semper praesens dolor est sanabilis: ergo |
| 10 | cura magis prodest venturis obvia morbis |
| 11 | atque ideo sanos etiam curarier est par. |
| 12 | Purgatur cerebrum mansa radice pyrethri, |
| 13 | unguitur et sucis, dederit quos parva sabucus, |
| 14 | expressusque hederae mandatur naribus umor |
| 15 | aut mixtum rutae cerebro instillatur acetum. |