Serenus Sammonicus, Medicinalis, III. Ad porriginem depellendam
| 1 | est insensibilis morbus, sed noxia formae, |
| 2 | cum caput immensa pexum porrigine ninguit, |
| 3 | copia farris uti frendentibus edita saxis. |
| 4 | Hanc poterit malvae radix decocta levare; |
| 5 | aut tu fenuculum nitrumque et sulphura viva |
| 6 | contere, deinde caput permixtis ablue cunctis; |
| 7 | furfuribusve novis durum miscebis acetum, |
| 8 | ut varios crines tali des unguine puros; |
| 9 | prodest et tarda demptus testudine sanguis |
| 10 | et prodest cedro demissus ab arbore sucus. |
| 11 | Desinet interea glomerari farrea nubis |
| 12 | cessabitque gravis crebrae porriginis imber. |