Serenus Sammonicus, Medicinalis, PRAEFATIO
| 1 | Phoebe, salutiferum quod pangimus adsere carmen |
| 2 | inventumque tuum prompto comitare favore. |
| 3 | Tuque, potens artis, reduces qui tradere vitas |
| 4 | nosti et in caelum manes revocare sepultos, |
| 5 | qui colis Aegeas, qui Pergama quique Epidaurum, |
| 6 | qui quondam placida tectus sub pelle draconis |
| 7 | Tarpeias arces atque inclita templa petisti |
| 8 | depellens taetros praesenti numine morbos: |
| 9 | huc ades et quicquid cupido mihi saepe locutus |
| 10 | firmasti, cunctum teneris expone papyris. |