Seneca, Phaedra, Scaena VIII. Theseus Phaedra Chorus
| 1 | Theseus Quis te dolore percitam instigat furor? |
| 2 | quid ensis iste quidve vociferatio |
| 3 | planctusque supra corpus invisum volunt? |
| 4 | Phaedra Me me, profundi saeve dominator freti, |
| 5 | invade et in me monstra caerulei maris |
| 6 | emitte, quidquid intimo Tethys sinu |
| 7 | extrema gestat, quidquid Oceanus vagis |
| 8 | complexus undis ultimo fluctu tegit. |
| 9 | O dure Theseu semper, o numquam tuis |
| 10 | tuto reverse: gnatus et genitor nece |
| 11 | reditus tuos luere; pervertis domum |
| 12 | amore semper coniugum aut odio nocens. |
| 13 | Hippolyte, tales intuor vultus tuos |
| 14 | talesque feci? membra quis saevus Sinis |
| 15 | aut quis Procrustes sparsit aut quis Cresius, |
| 16 | Daedalea vasto claustra mugitu replens, |
| 17 | taurus biformis ore cornigero ferox |
| 18 | divulsit? heu me, quo tuus fugit decor |
| 19 | oculique nostrum sidus? exanimis iaces? |
| 20 | ades parumper verbaque exaudi mea. |
| 21 | nil turpe loquimur: hac manu poenas tibi |
| 22 | solvam et nefando pectori ferrum inseram, |
| 23 | animaque Phaedram pariter ac scelere exuam. |
| 24 | [et te per undas perque Tartareos lacus, |
| 25 | per Styga, per amnes igneos amens sequar] |
| 26 | placemus umbras: capitis exuvias cape |
| 27 | laceraeque frontis accipe abscisam comam. |
| 28 | non licuit animos iungere, at certe licet |
| 29 | iunxisse fata. morere, si casta es, viro; |
| 30 | si incesta, amori. coniugis thalamos petam |
| 31 | tanto impiatos facinore? hoc derat nefas, |
| 32 | ut vindicato sancta fruereris toro. |
| 33 | o mors amoris una sedamen mali, |
| 34 | o mors pudoris maximum laesi decus, |
| 35 | confugimus ad te: pande placatos sinus. |
| 36 | Audite, Athenae, tuque, funesta pater |
| 37 | peior noverca: falsa memoravi et nefas, |
| 38 | quod ipsa demens pectore insano hauseram, |
| 39 | mentita finxi. vana punisti pater, |
| 40 | iuvenisque castus crimine incesto iacet, |
| 41 | pudicus, insons -- recipe iam mores tuos. |
| 42 | mucrone pectus impium iusto patet |
| 43 | cruorque sancto solvit inferias viro. |
| 44 | Th.Quid facere rapto debeas gnato parens, |
| 45 | disce a noverca: condere Acherontis plagis. |
| 46 | Pallidi fauces Averni vosque, Taenarii specus, |
| 47 | unda miseris grata Lethes vosque, torpentes lacus, |
| 48 | impium rapite atque mersum premite perpetuis malis. |
| 49 | nunc adeste, saeva ponti monstra, nunc vasti maris, |
| 50 | ultimo quodcumque Proteus aequorum abscondit sinu, |
| 51 | meque ovantem scelere tanto rapite in altos gurgites. |
| 52 | Tuque semper, genitor, irae facilis assensor meae: |
| 53 | morte facili dignus haud sum qui nova natum nece |
| 54 | segregem sparsi per agros quique, dum falsum nefas |
| 55 | exsequor vindex severus, incidi in verum scelus. |
| 56 | sidera et manes et undas scelere complevi meo: |
| 57 | amplius sors nulla restat; regna me norunt tria. |
| 58 | In hoc redimus? patuit ad caelum via, |
| 59 | bina ut viderem funera et geminam necem, |
| 60 | caelebs et orbus funebres una face |
| 61 | ut concremarem prolis ac thalami rogos? |
| 62 | donator atrae lucis, Alcide, tuum |
| 63 | Diti remitte munus; ereptos mihi |
| 64 | restitue manes. -- impius frustra invoco |
| 65 | mortem relictam: crudus et leti artifex, |
| 66 | exitia machinatus insolita effera, |
| 67 | nunc tibimet ipse iusta supplicia irroga. |
| 68 | pinus coacto vertice attingens humum |
| 69 | caelo remissum findat in geminas trabes, |
| 70 | mittarve praeceps saxa per Scironia? |
| 71 | graviora vidi, quae pati clausos iubet |
| 72 | Phlegethon nocentes igneo cingens vado. |
| 73 | quae poena memet maneat et sedes, scio: |
| 74 | umbrae nocentes, cedite et cervicibus |
| 75 | his, his repositum degravet fessas manus |
| 76 | saxum, seni perennis Aeolio labor; |
| 77 | me ludat amnis ora vicina alluens; |
| 78 | vultur relicto transvolet Tityo ferus |
| 79 | meumque poenae semper accrescat iecur; |
| 80 | et tu mei requiesce Pirithoi pater: |
| 81 | haec incitatis membra turbinibus ferat |
| 82 | nusquam resistens orbe revoluto rota. |
| 83 | Dehisce tellus, recipe me dirum chaos, |
| 84 | recipe, haec ad umbras iustior nobis via est: |
| 85 | gnatum sequor -- ne metue qui manes regis: |
| 86 | casti venimus; recipe me aeterna domo |
| 87 | non exiturum. -- non movent divos preces; |
| 88 | at, si rogarem scelera, quam proni forent! |
| 89 | Cho. Theseu, querelis tempus aeternum manet: |
| 90 | nunc iusta nato solve et absconde ocius |
| 91 | dispersa foede membra laniatu effero. |
| 92 | Th.Huc, huc, reliquias vehite cari corporis |
| 93 | pondusque et artus temere congestos date. |
| 94 | Hippolytus hic est? crimen agnosco meum: |
| 95 | ego te peremi; neu nocens tantum semel |
| 96 | solusve fierem, facinus ausurus parens |
| 97 | patrem advocavi. munere en patrio fruor. |
| 98 | o triste fractis orbitas annis malum! |
| 99 | complectere artus, quodque de nato est super, |
| 100 | miserande, maesto pectore incumbens, fove. |
| 101 | Disiecta, genitor, membra laceri corporis |
| 102 | in ordinem dispone et errantes loco |
| 103 | restitue partes: fortis hic dextrae locus, |
| 104 | hic laeva frenis docta moderandis manus |
| 105 | ponenda: laevi lateris agnosco notas. |
| 106 | quam magna lacrimis pars adhuc nostris abest! |
| 107 | durate trepidae lugubri officio manus, |
| 108 | fletusque largos sistite, arentes genae, |
| 109 | dum membra nato genitor adnumerat suo |
| 110 | corpusque fingit. hoc quid est forma carens |
| 111 | et turpe, multo vulnere abruptum undique? |
| 112 | quae pars tui sit dubito; sed pars est tui: |
| 113 | hic, hic repone, non suo, at vacuo loco. |
| 114 | haecne illa facies igne sidereo nitens, |
| 115 | inimica flectens lumina? huc cecidit decor? |
| 116 | o dira fata, numinum o saevus favor! |
| 117 | sic ad parentem natus ex voto redit? |
| 118 | en haec suprema dona genitoris cape, |
| 119 | saepe efferendus; interim haec ignes ferant. |
| 120 | Patefacite acerbam caede funesta domum; |
| 121 | Mopsopia claris tota lamentis sonet. |
| 122 | vos apparate regii flammam rogi; |
| 123 | at vos per agros corporis partes vagas |
| 124 | inquirite. -- istam terra defossam premat, |
| 125 | gravisque tellus impio capiti incubet. |