Seneca, Oedipus, Scaena IX. Oedipus Chorus Iocasta
| 1 | Oedipus Bene habet, peractum est: iusta persolvi patri. |
| 2 | iuvant tenebrae. quis deus tandem mihi |
| 3 | placatus atra nube perfundit caput? |
| 4 | quis scelera donat? conscium evasi diem. |
| 5 | nil, parricida, dexterae debes tuae: |
| 6 | lux te refugit. vultus Oedipodam hic decet. |
| 7 | Cho. En ecce, rapido saeva prosiluit gradu |
| 8 | Iocasta vaecors, qualis attonita et furens |
| 9 | Cadmea mater abstulit gnato caput |
| 10 | sensitve raptum. dubitat afflictum alloqui, |
| 11 | cupit pavetque. iam malis cessit pudor, |
| 12 | sed haeret ore prima vox. Iocasta Quid te vocem? |
| 13 | gnatumne? dubitas? gnatus es: gnatum pudet; |
| 14 | invite loquere gnate -- quo avertis caput |
| 15 | vacuosque vultus? Oe. Quis frui tenebris vetat? |
| 16 | quis reddit oculos? matris, en matris sonus! |
| 17 | perdidimus operam. congredi fas amplius |
| 18 | haut est nefandos. dividat vastum mare |
| 19 | dirimatque tellus abdita et quisquis sub hoc |
| 20 | in alia versus sidera ac solem avium |
| 21 | dependet orbis alterum ex nobis ferat. |
| 22 | Ioc.Fati ista culpa est: nemo fit fato nocens. |
| 23 | Oe. Iam parce verbis, mater, et parce auribus: |
| 24 | per has reliquias corporis trunci precor, |
| 25 | per inauspicatum sanguinis pignus mei, |
| 26 | per omne nostri nominis fas ac nefas. |
| 27 | Ioc. Quid, anime, torpes? socia cur scelerum dare |
| 28 | poenas recusas? omne confusum perit, |
| 29 | incesta, per te iuris humani decus: |
| 30 | morere et nefastum spiritum ferro exige. |
| 31 | non si ipse mundum concitans divum sator |
| 32 | corusca saeva tela iaculetur manu, |
| 33 | umquam rependam sceleribus poenas pares |
| 34 | mater nefanda. mors placet: mortis via |
| 35 | quaeratur. -- Agedum, commoda matri manum, |
| 36 | si parricida es. restat hoc operi ultimum: |
| 37 | rapiatur ensis; hoc iacet ferro meus |
| 38 | coniunx -- quid illum nomine haud vero vocas? |
| 39 | socer est. utrumne pectori infigam meo |
| 40 | telum an patenti conditum iugulo inprimam? |
| 41 | eligere nescis vulnus: hunc, dextra, hunc pete |
| 42 | uterum capacem, qui virum et gnatos tulit. |
| 43 | Cho. Iacet perempta. vulneri immoritur manus |
| 44 | ferrumque secum nimius eiecit cruor. |
| 45 | Oe. Fatidice te, te praesidem veri deum |
| 46 | compello: solum debui fatis patrem; |
| 47 | bis parricida plusque quam timui nocens |
| 48 | matrem peremi: scelere confecta est meo. |
| 49 | o Phoebe mendax, fata superavi impia. |
| 50 | Pavitante gressu sequere fallentes vias; |
| 51 | suspensa plantis efferens vestigia |
| 52 | caecam tremente dextera noctem rege. |
| 53 | ingredere praeceps, lubricos ponens gradus, |
| 54 | i profuge vade -- siste, ne in matrem incidas. |
| 55 | Quicumque fessi corpore et morbo graves |
| 56 | semanima trahitis pectora, en fugio, exeo: |
| 57 | relevate colla. mitior caeli status |
| 58 | posterga sequitur: quisquis exilem iacens |
| 59 | animam retentat, vividos haustus levis |
| 60 | concipiat. ite, ferte depositis opem: |
| 61 | mortifera mecum vitia terrarum extraho. |
| 62 | Violenta Fata et horridus Morbi tremor, |
| 63 | Maciesque et atra Pestis et rabidus Dolor, |
| 64 | mecum ite, mecum. ducibus his uti libet. |