Seneca, Oedipus, Scaena VI. Senex Corinthius Oedipus
| 1 | Senex Corinthius te populus in regnum vocat |
| 2 | patrium: quietem Polybus aeternam obtinet. |
| 3 | Oe.Ut undique in me saeva Fortuna irruit! |
| 4 | edissere agedum, quo cadat fato parens. |
| 5 | Sen Animam senilem mollis exsolvit sopor. |
| 6 | Oe. Genitor sine ulla caede defunctus iacet: |
| 7 | testor, licet iam tollere ad caelum pie |
| 8 | puras nec ulla scelera metuentes manus. |
| 9 | Sed pars magis metuenda fatorum manet. |
| 10 | Sen Omnem paterna regna discutient metum. |
| 11 | Oe.Repetam paterna regna; sed matrem horreo. |
| 12 | Sen Metuis parentem, quae tuum reditum expetens |
| 13 | sollicita pendet? Oe. Ipsa me pietas fugat. |
| 14 | Sen Viduam relinques? Oe. Tangis en ipsos metus. |
| 15 | Sen Effare mersus quis premat mentem timor; |
| 16 | praestare tacitam regibus soleo fidem. |
| 17 | Oe.Conubia matris Delphico monitu tremo. |
| 18 | Sen Timere vana desine et turpes metus |
| 19 | depone. Merope vera non fuerat parens. |
| 20 | Oe. Quod subditivi praemium gnati petit? |
| 21 | Sen Regum superbam liberi astringunt fidem. |
| 22 | Oe.Secreta thalami fare quo excipias modo. |
| 23 | Sen Hae te parenti parvulum tradunt manus. |
| 24 | Oe. Tu me parenti tradis; at quis me tibi? |
| 25 | Sen Pastor nivoso sub Cithaeronis iugo. |
| 26 | Oe. In illa temet nemora quis casus tulit? |
| 27 | Sen Illo sequebar monte cornigeros greges. |
| 28 | Oe. Nunc adice certas corporis nostri notas. |
| 29 | Sen Forata ferro gesseras vestigia, |
| 30 | tumore nactus nomen ac vitio pedum. |
| 31 | Oe.Quis fuerit ille qui meum dono dedit |
| 32 | corpus requiro. Sen Regios pavit greges; |
| 33 | minor sub illo turba pastorum fuit. |
| 34 | Oe.Eloquere nomen. Sen Prima languescit senum |
| 35 | memoria longo lassa sublabens situ. |
| 36 | Oe.Potesne facie noscere ac vultu virum? |
| 37 | Sen Fortasse noscam: saepe iam spatio obrutam |
| 38 | levis exoletam memoriam revocat nota. |
| 39 | Oe. Ad sacra et aras omne compulsum pecus |
| 40 | duces sequuntur: ite, propere accersite, |
| 41 | famuli, penes quem summa consistit gregum. |
| 42 | Ioc. Sive ista ratio sive fortuna occulit, |
| 43 | latere semper patere quod latuit diu: |
| 44 | saepe eruentis veritas patuit malo. |
| 45 | Oe. Malum timeri maius his aliquod potest? |
| 46 | Ioc. Magnum esse magna mole quod petitur scias: |
| 47 | concurrit illinc publica, hinc regis salus, |
| 48 | utrimque paria; contine medias manus: |
| 49 | ut nil lacessas, ipsa se fata explicant. |
| 50 | Oe.Non expedit concutere felicem statum: |
| 51 | tuto movetur quidquid extremo in loco est. |
| 52 | Ioc.Nobilius aliquid genere regali appetis? |
| 53 | ne te parentis pigeat inventi vide. |
| 54 | Oe. Vel paenitendi sanguinis quaeram fidem: |
| 55 | sic nosse certum est. -- Ecce grandaevus senex, |
| 56 | arbitria sub quo regii fuerant gregis, |
| 57 | Phorbas. refersne nomen aut vultum senis? |
| 58 | Sen Adridet animo forma; nec notus satis, |
| 59 | nec rursus iste vultus ignotus mihi. |
| 60 | Oe. Regnum optinente Laio famulus greges |
| 61 | agitasti opimos sub Cithaeronis plaga? |