Seneca, Oedipus, Scaena V. Oedipus Iocasta
| 1 | Oedipus Curas revolvit animus et repetit metus. |
| 2 | obisse nostro Laium scelere autumant |
| 3 | superi inferique, sed animus contra innocens |
| 4 | sibique melius quam deis notus negat. |
| 5 | redit memoria tenue per vestigium, |
| 6 | cecidisse nostri stipitis pulsu obvium |
| 7 | datumque Diti, cum prior iuvenem senex |
| 8 | curru superbus pelleret, Thebis procul |
| 9 | Phocaea trifidas regio qua scindit vias. |
| 10 | Unanima coniunx, explica errores, precor: |
| 11 | quae spatia moriens Laius vitae tulit? |
| 12 | primone in aevo viridis an fracto occidit? |
| 13 | Iocasta Inter senem iuvenemque, sed propior seni. |
| 14 | Oe. Frequensne turba regium cinxit latus? |
| 15 | Ioc. Plures fefellit error ancipitis viae, |
| 16 | paucos fidelis curribus iunxit labor. |
| 17 | Oe. Aliquisne cecidit regio fato comes? |
| 18 | Ioc.Unum fides virtusque consortem addidit. |
| 19 | Oe. Teneo nocentem: convenit numerus, locus-- |
| 20 | sed tempus adde. Ioc. Decima iam metitur seges. |