Seneca, Medea, 5, Scaena III. Iason Medea Filii Medeae Armiferi
| 1 | Ias. quicumque regum cladibus fidus doles, |
| 2 | concurre, ut ipsam sceleris auctorem horridi |
| 3 | capiamus. huc, huc, fortis armiferi cohors, |
| 4 | conferte tela, vertite ex imo domum. |
| 5 | Med. iam iam recepi sceptra germanum patrem, |
| 6 | spoliumque Colchi pecudis auratae tenent; |
| 7 | rediere regna, rapta virginitas redit. |
| 8 | o placida tandem numina, o festum diem, |
| 9 | o nuptialem! vade, perfectum est scelus; |
| 10 | vindicta nondum: perage, dum faciunt manus. |
| 11 | quid nunc moraris, anime? quid dubitas potens? |
| 12 | iam cecidit ira? paenitet facti, pudet. |
| 13 | quid, misera, feci? misera? paeniteat licet, |
| 14 | feci - voluptas magna me invitam subit, |
| 15 | et ecce crescit. derat hoc unum mihi, |
| 16 | spectator iste. nil adhuc facti reor: |
| 17 | quidquid sine isto fecimus sceleris perit. |
| 18 | Ias. en ipsa tecti parte praecipiti imminet. |
| 19 | huc rapiat ignes aliquis, ut flammis cadat |
| 20 | suis perusta. Med. congere extremum tuis |
| 21 | natis, Iason, funus ac tumulum strue: |
| 22 | coniunx socerque iusta iam functis habent, |
| 23 | a me sepulti; natus hic fatum tulit, |
| 24 | hic te vidente dabitur exitio pari. |
| 25 | Ias. per numen omne perque communes fugas |
| 26 | torosque, quos non nostra violavit fides, |
| 27 | iam parce nato. si quod est crimen, meum est: |
| 28 | me dedo morti; noxium macta caput. |
| 29 | Med. hac qua recusas, qua doles, ferrum exigam. |
| 30 | i nunc, superbe, virginum thalamos pete, |
| 31 | relinque matres. Ias. unus est poenae satis. |
| 32 | Med. si posset una caede satiari haec manus, |
| 33 | nullam petisset. ut duos perimam, tamen |
| 34 | nimium est dolori numerus angustus meo. |
| 35 | in matre si quod pignus etiamnunc latet, |
| 36 | scrutabor ense viscera et ferro extraham. |
| 37 | Ias. iam perage coeptum facinus, haut ultra precor, |
| 38 | moramque saltem supplicis dona meis. |
| 39 | Med. perfruere lento scelere, ne propera, dolor: |
| 40 | meus dies est; tempore accepto utimur. |
| 41 | Ias. infesta, memet perime. Med. misereri iubes. |
| 42 | bene est, peractum est. plura non habui, dolor, |
| 43 | quae tibi litarem. lumina huc tumida alleva, |
| 44 | ingrate Iason. coniugem agnoscis tuam? |
| 45 | sic fugere soleo. patuit in caelum via: |
| 46 | squamosa gemini colla serpentes iugo |
| 47 | summissa praebent. recipe iam natos, parens; |
| 48 | ego inter auras aliti curru vehar. |
| 49 | Ias. per alta vade spatia sublime aethere, |
| 50 | testare nullos esse, qua veheris, deos. |