Seneca, Medea, 5, Scaena II. Nutrix Medea Filii Medeae
| 1 | Nut. effer citatum sede Pelopea gradum, |
| 2 | Medea, praeceps quaslibet terras pete. |
| 3 | Med. egone ut recedam? si profugissem prius, |
| 4 | ad hoc redirem. nuptias specto novas. |
| 5 | quid, anime, cessas? sequere felicem impetum. |
| 6 | pars ultionis ista, qua gaudes, quota est? |
| 7 | amas adhuc, furiose, si satis est tibi |
| 8 | caelebs Iason. quaere poenarum genus |
| 9 | haut usitatum iamque sic temet para: |
| 10 | fas omne cedat, abeat expulsus pudor; |
| 11 | vindicta levis est quam ferunt purae manus. |
| 12 | incumbe in iras teque languentem excita |
| 13 | penitusque veteres pectore ex imo impetus |
| 14 | violentus hauri. quidquid admissum est adhuc, |
| 15 | pietas vocetur. hoc age et faxis sciant |
| 16 | quam levia fuerint quamque vulgaris notae |
| 17 | quae commodavi scelera. prolusit dolor |
| 18 | per ista noster: quid manus poterant rudes |
| 19 | audere magnum? quid puellaris furor? |
| 20 | Medea nunc sum; crevit ingenium malis. |
| 21 | iuvat, iuvat rapuisse fraternum caput, |
| 22 | artus iuvat secuisse et arcano patrem |
| 23 | spoliasse sacro, iuvat in exitium senis |
| 24 | armasse natas. quaere materiam, dolor: |
| 25 | ad omne facinus non rudem dextram afferes. |
| 26 | quo te igitur, ira, mittis, aut quae perfido |
| 27 | intendis hosti tela? nescio quid ferox |
| 28 | decrevit animus intus et nondum sibi |
| 29 | audet fateri. stulta properavi nimis: |
| 30 | ex paelice utinam liberos hostis meus |
| 31 | aliquos haberet - quidquid ex illo tuum est, |
| 32 | Creusa peperit. placuit hoc poenae genus, |
| 33 | meritoque placuit: ultimum, agnosco, scelus |
| 34 | animo parandum est - liberi quondam mei, |
| 35 | vos pro paternis sceleribus poenas date. |
| 36 | cor pepulit horror, membra torpescunt gelu |
| 37 | pectusque tremuit. ira discessit loco |
| 38 | materque tota coniuge expulsa redit. |
| 39 | egone ut meorum liberum ac prolis meae |
| 40 | fundam cruorem? melius, a, demens furor! |
| 41 | incognitum istud facinus ac dirum nefas |
| 42 | a me quoque absit; quod scelus miseri luent? |
| 43 | scelus est Iason genitor et maius scelus |
| 44 | Medea mater - occidant, non sunt mei; |
| 45 | pereant, mei sunt. crimine et culpa carent, |
| 46 | sunt innocentes: fateor, et frater fuit. |
| 47 | quid, anime, titubas? ora quid lacrimae rigant |
| 48 | variamque nunc huc ira, nunc illuc amor |
| 49 | diducit? anceps aestus incertam rapit; |
| 50 | ut saeva rapidi bella cum venti gerunt, |
| 51 | utrimque fluctus maria discordes agunt |
| 52 | dubiumque fervet pelagus, haut aliter meum |
| 53 | cor fluctuatur: ira pietatem fugat |
| 54 | iramque pietas - cede pietati, dolor. |
| 55 | huc, cara proles, unicum afflictae domus |
| 56 | solamen, huc vos ferte et infusos mihi |
| 57 | coniungite artus. habeat incolumes pater, |
| 58 | dum et mater habeat - urguet exilium ac fuga: |
| 59 | iam iam meo rapientur avulsi e sinu, |
| 60 | flentes, gementes osculis - pereant patri, |
| 61 | periere matri. rursus increscit dolor |
| 62 | et fervet odium, repetit invitam manum |
| 63 | antiqua Erinys - ira, qua ducis, sequor. |
| 64 | utinam superbae turba Tantalidos meo |
| 65 | exisset utero bisque septenos parens |
| 66 | natos tulissem! sterilis in poenas fui - |
| 67 | fratri patrique quod sat est, peperi duos. |
| 68 | [Furiae et umbra Absyrti Medeae fratris cum fascibus.] |
| 69 | quonam ista tendit turba Furiarum impotens? |
| 70 | quem quaerit aut quo flammeos ictus parat, |
| 71 | aut cui cruentas agmen infernum faces |
| 72 | intentat? ingens anguis excusso sonat |
| 73 | tortus flagello. quem trabe infesta petit |
| 74 | Megaera? - cuius umbra dispersis venit |
| 75 | incerta membris? frater est, poenas petit - |
| 76 | dabimus, sed omnes. fige luminibus faces, |
| 77 | lania, perure, pectus en Furiis patet. |
| 78 | discedere a me, frater, ultrices deas |
| 79 | manesque ad imos ire securas iube: |
| 80 | mihi me relinque et utere hac, frater, manu |
| 81 | quae strinxit ensem - victima manes tuos |
| 82 | placamus ista. quid repens affert sonus? |
| 83 | parantur arma meque in exitium petunt. |
| 84 | excelsa nostrae tecta conscendam domus |
| 85 | caede incohata. perge tu mecum comes. |
| 86 | tuum quoque ipsa corpus hinc mecum aveham. |
| 87 | nunc hoc age, anime: non in occulto tibi est |
| 88 | perdenda virtus; approba populo manum. |