Seneca, Medea, 1, Prologus. Medea
| 1 | Di coniugales tuque genialis tori, |
| 2 | Lucina, custos quaeque domituram freta |
| 3 | Tiphyn novam frenare docuisti ratem, |
| 4 | et tu, profundi saeve dominator maris, |
| 5 | clarumque Titan dividens orbi diem, |
| 6 | tacitisque praebens conscium sacris iubar |
| 7 | Hecate triformis, quosque iuravit mihi |
| 8 | deos Iason, quosque Medeae magis |
| 9 | fas est precari: noctis aeternae chaos, |
| 10 | aversa superis regna manesque impios |
| 11 | dominumque regni tristis et dominam fide |
| 12 | meliore raptam, voce non fausta precor. |
| 13 | nunc, nunc adeste sceleris ultrices deae, |
| 14 | crinem solutis squalidae serpentibus, |
| 15 | atram cruentis manibus amplexae facem, |
| 16 | adeste, thalamis horridae quondam meis |
| 17 | quales stetistis: coniugi letum novae |
| 18 | letumque socero et regiae stirpi date. |
| 19 | mihi peius aliquid, quod precer sponso manet: |
| 20 | vivat. per urbes erret ignotas egens |
| 21 | exul pavens invisus incerti laris, |
| 22 | iam notus hospes limen alienum expetat, |
| 23 | me coniugem optet quoque non aliud queam |
| 24 | peius precari, liberos similes patri |
| 25 | similesque matri - parta iam, parta ultio est: |
| 26 | peperi. querelas verbaque in cassum sero? |
| 27 | non ibo in hostes? manibus excutiam faces |
| 28 | caeloque lucem - spectat hoc nostri sator |
| 29 | Sol generis, et spectatur, et curru insidens |
| 30 | per solita puri spatia decurrit poli? |
| 31 | non redit in ortus et remetitur diem? |
| 32 | da, da per auras curribus patriis vehi, |
| 33 | committe habenas, genitor, et flagrantibus |
| 34 | ignifera loris tribue moderari iuga: |
| 35 | gemino Corinthos litori opponens moras |
| 36 | cremata flammis maria committat duo. |
| 37 | hoc restat unum, pronubam thalamo feram |
| 38 | ut ipsa pinum postque sacrificas preces |
| 39 | caedam dicatis victimas altaribus. |
| 40 | per viscera ipsa quaere supplicio viam, |
| 41 | si vivis, anime, si quid antiqui tibi |
| 42 | remanet vigoris; pelle femineos metus |
| 43 | et inhospitalem Caucasum mente indue. |
| 44 | quodcumque vidit Pontus aut Phasis nefas, |
| 45 | videbit Isthmos. effera ignota horrida, |
| 46 | tremenda caelo pariter ac terris mala |
| 47 | mens intus agitat: vulnera et caedem et vagum |
| 48 | funus per artus - levia memoravi nimis: |
| 49 | haec virgo feci; gravior exurgat dolor: |
| 50 | maiora iam me scelera post partus decent. |
| 51 | accingere ira teque in exitium para |
| 52 | furore toto. paria narrentur tua |
| 53 | repudia thalamis: quo virum linques modo? |
| 54 | hoc quo secuta es. rumpe iam segnes moras: |
| 55 | quae scelere parta est, scelere linquenda est domus. |