Seneca, Agamemnon, 4, Scaena II. Agamemnon Cassandra
| 1 | Agam. Tandem revertor sospes ad patrios lares; |
| 2 | o cara salve terra! tibi tot barbarae |
| 3 | dedere gentes spolia, tibi felix diu |
| 4 | potentis Asiae domina summisit manus. |
| 5 | Quid ista vates corpus effusa ac tremens |
| 6 | dubia labat cervice? famuli, attollite, |
| 7 | refovete gelido latice. iam recipit diem |
| 8 | marcente visu. Suscita sensus tuos: |
| 9 | optatus ille portus aerumnis adest. |
| 10 | festus dies est. |
| 11 | Cass. Festus et Troiae fuit. |
| 12 | Agam. Veneremur aras |
| 13 | Cass. Cecidit ante aras pater. |
| 14 | Agam. Iovem precemur pariter |
| 15 | Cass. Herceum Iovem? |
| 16 | Agam. Credis videre te Ilium? |
| 17 | Cass. Et Priamum simul. |
| 18 | Agam. Hic Troia non est. |
| 19 | Cass. Ubi Helena est, Troiam puta. |
| 20 | Agam. Ne metue dominam famula. |
| 21 | Cass. Libertas adest. |
| 22 | Agam. Secura vive. |
| 23 | Cass. Mihi mori est securitas. |
| 24 | Agam. Nullum est periclum tibimet. |
| 25 | Cass. At magnum tibi. |
| 26 | Agam. Victor timere quid potest? |
| 27 | Cass. Quod non timet. |
| 28 | Agam. Hanc fida famuli turba, dum excutiat deum, |
| 29 | retinete ne quid impotens peccet furor. |
| 30 | At te, pater, qui saeva torques fulmina |
| 31 | pellisque nubes, sidera et terras regis, |
| 32 | ad quem triumphi spolia victores ferunt, |
| 33 | et te sororem cuncta pollentis viri, |
| 34 | Argolica Iuno, pecore votivo libens |
| 35 | Arabumque donis supplice et fibra colam. |