Seneca, Agamemnon, 4, Scaena I. Cassandra Chorus Iliadum
| 1 | Cass. Cohibete lacrimas omne quas tempus petet, |
| 2 | Troades, et ipsae vestra lamentabili |
| 3 | lugete gemitu funera: aerumnae meae |
| 4 | socium recusant. cladibus questus meis |
| 5 | removete: nostris ipsa sufficiam malis. |
| 6 | Cho. Lacrimas lacrimis miscere iuvat: |
| 7 | magis exurunt quos secretae |
| 8 | lacerant curae, iuvat in medium |
| 9 | deflere suos. Nec tu, quamvis |
| 10 | dura virago patiensque mali, |
| 11 | poteris tantas flere ruinas. |
| 12 | non quae verno mobile carmen |
| 13 | ramo cantat tristis aedon |
| 14 | Ityn in varios modulata sonos, |
| 15 | non quae tectis Bistonis ales |
| 16 | residens summis impia diri |
| 17 | furta mariti garrula narrat, |
| 18 | lugere tuam poterit digne |
| 19 | conquesta domum, licet ipse velit |
| 20 | clarus niveos inter olores |
| 21 | Histrum cycnus Tanainque colens |
| 22 | extrema loqui, licet alcyones |
| 23 | Ceyca suum fluctu leviter |
| 24 | plangente sonent, cum tranquillo |
| 25 | male confisae credunt iterum |
| 26 | pelago audaces fetusque suos |
| 27 | nido pavidae titubante fovent, |
| 28 | non si molles imitata viros |
| 29 | tristis laceret bracchia tecum |
| 30 | quae turritae turba parenti |
| 31 | pectora rauco concita buxo |
| 32 | ferit ut Phrygium lugeat Attin. |
| 33 | non est lacrimis, Cassandra, modus, |
| 34 | quia quae patimur vicere modum. |
| 35 | Sed cur sacratas deripis capiti infulas? |
| 36 | miseris colendos maxime superos putem. |
| 37 | Cass. Vicere nostra iam metus omnis mala. |
| 38 | equidem nec ulla caelites placo prece |
| 39 | nec, si velint saevire, quo noceant habent. |
| 40 | Fortuna vires ipsa consumpsit suas. |
| 41 | quae patria restat, quis pater, quae iam soror? |
| 42 | bibere tumuli sanguinem atque arae meum. |
| 43 | quid illa felix turba fraterni gregis? |
| 44 | exhausta nempe: regia miseri senes |
| 45 | vacua relicti, totque per thalamos vident |
| 46 | praeter Lacaenam ceteras viduas nurus. |
| 47 | tot illa regum mater et regimen Phrygum, |
| 48 | fecunda in ignes Hecuba fatorum novas |
| 49 | experta leges induit vultos feros: |
| 50 | circa ruinas rabida latravit suas, |
| 51 | Troiae superstes, Hectori, Priamo, sibi. |
| 52 | Cho. Silet repente Phoebas et pallor genas |
| 53 | creberque totum possidet corpus tremor; |
| 54 | stetere vittae, mollis horrescit coma, |
| 55 | anhela corda murmure incluso fremunt, |
| 56 | incerta nutant lumina et versi retro |
| 57 | torquentur oculi, rursus immoti rigent. |
| 58 | nunc levat in auras altior solito caput |
| 59 | graditurque celsa, nunc reluctantis parat |
| 60 | reserare fauces, verba nunc clauso male |
| 61 | custodit ore maenas impatiens dei. |
| 62 | Cass. Quid me furoris incitam stimulis novi, |
| 63 | quid mentis inopem, sacra Parnasi iuga, |
| 64 | rapitis? recede, Phoebe, iam non sum tua, |
| 65 | extingue flammas pectori infixas meo. |
| 66 | cui nunc vagor vesana? cui bacchor furens? |
| 67 | iam Troia cecidit -- falsa quid vates agor? |
| 68 | Ubi sum? fugit lux alma et obscurat genas |
| 69 | nox alta et aether abditus tenebris latet. |
| 70 | sed ecce gemino sole praefulget dies |
| 71 | geminumque duplices Argos attollit domus. |
| 72 | Idaea cerno nemora: fatalis sedet |
| 73 | inter potentes arbiter pastor deas. |
| 74 | timete, reges, moneo, furtivum genus: |
| 75 | agrestis iste alumnus evertet domum. |
| 76 | Quid ista vecors tela feminea manu |
| 77 | destricta praefert? quem petit dextra virum |
| 78 | Lacaena cultu, ferrum Amazonium gerens? |
| 79 | quae versat oculos alia nunc facies meos? |
| 80 | victor ferarum colla sublimis iacet |
| 81 | ignobili sub dente Marmaricus leo, |
| 82 | morsus cruentos passus audacis leae. |
| 83 | Quid me vocatis sospitem solam e meis, |
| 84 | umbrae meorum? te sequor, tota pater |
| 85 | Troia sepulte; frater, auxilium Phrygum |
| 86 | terrorque Danaum, non ego antiquum decus |
| 87 | video aut calentes ratibus exustis manus, |
| 88 | sed lacera membra et saucios vinclo gravi |
| 89 | illos lacertos. te sequor, nimium cito |
| 90 | congresse Achilli Troile; incertos geris, |
| 91 | Deiphobe, vultus, coniugis munus novae. |
| 92 | iuvat per ipsos ingredi Stygios lacus, |
| 93 | iuvat videre Tartari saevum canem |
| 94 | avidique regna Ditis! haec hodie ratis |
| 95 | Phlegethontis atri regias animas vehet, |
| 96 | victamque victricemque. vos, umbrae, precor, |
| 97 | iurata superis unda, te pariter precor: |
| 98 | reserate paulum terga nigrantis poli, |
| 99 | levis ut Mycenas turba prospiciat Phrygum. |
| 100 | spectate, miseri: fata se vertunt retro. |
| 101 | Instant sorores squalidae, |
| 102 | anguinea iactant verbera, |
| 103 | fert laeva semustas faces |
| 104 | turgentque pallentes genae |
| 105 | et vestis atri funeris |
| 106 | exesa cingit ilia |
| 107 | strepuntque nocturni metus |
| 108 | et ossa vasti corporis |
| 109 | corrupta longinquo situ |
| 110 | palude limosa iacent. |
| 111 | Et ecce, defessus senex |
| 112 | ad ora ludentes aquas |
| 113 | non captat oblitus sitim, |
| 114 | maestus futuro funere. |
| 115 | exultat et ponit gradus |
| 116 | pater decoros Dardanus. |
| 117 | Cho. Iam pervagatus ipse se fregit furor, |
| 118 | caditque flexo qualis ante aras genu |
| 119 | cervice taurus vulnus incertum gerens. |
| 120 | relevemus artus. -- En deos tandem suos |
| 121 | victrice lauru cinctus Agamemnon adit, |
| 122 | et festa coniunx obvios illi tulit |
| 123 | gressus reditque iuncta concordi gradu. |