Seneca, Agamemnon, 3, Scaena I. Eurybates Clytaemnestra Chorus
| 1 | Eur. Delubra et aras caelitum et patrios lares |
| 2 | post longa fessus spatia, vix credens mihi, |
| 3 | supplex adoro. vota superis solvite: |
| 4 | telluris altum remeat Argolicae decus |
| 5 | tandem ad penates victor Agamemnon suos. |
| 6 | Clyt. Felix ad aures nuntius venit meas. |
| 7 | ubinam petitus per decem coniunx mihi |
| 8 | annos moratur? pelagus an terras premit? |
| 9 | Eur. Incolumis, auctus gloria, laude inclitus |
| 10 | reducem expetito litori impressit pedem. |
| 11 | Clyt. Sacris colamus prosperum tandem diem |
| 12 | et si propitios attamen lentos deos. |
| 13 | Tu pande vivat coniugis frater mei |
| 14 | et pande teneat quas soror sedes mea. |
| 15 | Eur. Meliora votis posco et obtestor deos: |
| 16 | nam certa fari sors maris dubii vetat. |
| 17 | ut sparsa tumidum classis excepit mare, |
| 18 | ratis videre socia non potuit ratem. |
| 19 | quin ipse Atrides aequore immenso vagus |
| 20 | graviora pelago damna quam bello tulit |
| 21 | remeatque victo similis, exiguas trahens |
| 22 | lacerasque victor classe de tanta rates. |
| 23 | Clyt. Effare, casus quis rates hausit meas? |
| 24 | Aut quae maris fortuna dispulerit duces. |
| 25 | Eur. Acerba fatu poscis, infaustum iubes |
| 26 | miscere laeto nuntium. refugit loqui |
| 27 | mens aegra tantis atque inhorrescit malis. |
| 28 | Clyt. Exprome: clades scire qui refugit suas |
| 29 | gravat timorem; dubia plus torquent mala. |
| 30 | Eur. Ut Pergamum omne Dorica cecidit face, |
| 31 | divisa praeda est, maria properantes petunt. |
| 32 | iamque ense fessum miles exonerat latus, |
| 33 | neglecta summas scuta per puppes iacent; |
| 34 | ad militares remus aptatur manus |
| 35 | omnisque nimium longa properanti mora est. |
| 36 | signum recursus regia ut fulsit rate |
| 37 | et clara laetum remigem monuit tuba, |
| 38 | aurata primas prora designat vias |
| 39 | aperitque cursus, mille quos puppes secent. |
| 40 | Hinc aura primo lenis impellit rates |
| 41 | adlapsa velis; unda vix actu levi |
| 42 | tranquilla Zephyri mollis afflatu tremit, |
| 43 | splendetque classe pelagus et pariter latet. |
| 44 | iuvat videre nuda Troiae litora, |
| 45 | iuvat relicti sola Sigei loca. |
| 46 | properat iuventus omnis adductos simul |
| 47 | lentare remos, adiuvat ventos manu |
| 48 | et valida nisu bracchia alterno movet. |
| 49 | sulcata vibrant aequora et latera increpant |
| 50 | dirimuntque canae caerulum spumae mare. |
| 51 | Ut aura plenos fortior tendit sinus, |
| 52 | posuere tonsas, credita est vento ratis |
| 53 | fususque transtris miles aut terras procul, |
| 54 | quantum recedunt vela, fugientes notat, |
| 55 | aut bella narrat: Hectoris fortis minas |
| 56 | currusque et empto redditum corpus rogo, |
| 57 | sparsum cruore regis Herceum Iovem. |
| 58 | tunc qui iacente reciprocus ludit salo |
| 59 | tumidumque pando transilit dorso mare |
| 60 | Tyrrhenus omni piscis exultat freto |
| 61 | agitatque gyros et comes lateri adnatat, |
| 62 | anteire naves laetus et rursus sequi; |
| 63 | nunc prima tangens rostra lascivit chorus, |
| 64 | millesimam nunc ambit et lustrat ratem. |
| 65 | iam litus omne tegitur et campi latent |
| 66 | et dubia pereunt montis Idaei iuga; |
| 67 | et vix (quod unum pervicax acies videt) |
| 68 | Iliacus atra fumus apparet nota. |
| 69 | Iam lassa Titan colla relevabat iugo, |
| 70 | in astra iam lux prona, iam praeceps dies: |
| 71 | exigua nubes sordido crescens globo |
| 72 | nitidum cadentis inquinat Phoebi iubar; |
| 73 | suspecta varius occidens fecit freta. |
| 74 | nox prima caelum sparserat stellis, iacent |
| 75 | deserta vento vela. tum murmur grave, |
| 76 | maiora minitans, collibus summis cadit |
| 77 | tractuque longo litus ac petrae gemunt; |
| 78 | agitata ventis unda venturis tumet: |
| 79 | cum subito luna conditur, stellae latent; |
| 80 | In astra pontus tollitur, caelum perit. |
| 81 | nec una nox est: densa tenebras obruit |
| 82 | caligo et omni luce subducta fretum |
| 83 | caelumque miscet. undique incumbunt simul |
| 84 | rapiuntque pelagus infimo eversum solo |
| 85 | adversus Euro Zephyrus et Boreae Notus. |
| 86 | sua quisque mittunt tela et infesti fretum |
| 87 | emoliuntur, turbo convolvit mare: |
| 88 | Strymonius altas Aquilo contorquet nives |
| 89 | Libycusque harenas Auster ac Syrtes agit, |
| 90 | [nec manet in Austro; fit gravis nimbis Notus] |
| 91 | imbre auget undas; Eurus orientem movet |
| 92 | Nabataea quatiens regna et Eoos sinus. |
| 93 | quid rabidus ora Corus Oceano exerens? |
| 94 | mundum revelli sedibus totum suis |
| 95 | ipsosque rupto crederes caelo deos |
| 96 | decidere et atrum rebus induci chaos. |
| 97 | vento resistit aestus et ventus retro |
| 98 | aestum revolvit; non capit sese mare: |
| 99 | undasque miscent imber et fluctus suas. |
| 100 | nec hoc levamen denique aerumnis datur, |
| 101 | videre saltem et nosse quo pereant malo: |
| 102 | premunt tenebrae lumina et dirae Stygis |
| 103 | inferna nox est. excidunt ignes tamen |
| 104 | et nube dirum fulmen elisa micat; |
| 105 | miserisque lucis tanta dulcedo est malae: |
| 106 | hoc lumen optant. Ipsa se classis premit |
| 107 | et prora prorae nocuit et lateri latus. |
| 108 | illam dehiscens pontus in praeceps rapit |
| 109 | hauritque et alto redditam revomit mari; |
| 110 | haec onere sidit, illa convulsum latus |
| 111 | submittit undis, fluctus hanc decimus tegit; |
| 112 | haec lacera et omni decore populato levis |
| 113 | fluitat nec illi vela nec tonsae manent |
| 114 | nec rectus altas malus antemnas ferens, |
| 115 | sed trunca toto puppis Ionio natat. |
| 116 | Nil ratio et usus audet: ars cessit malis; |
| 117 | tenet horror artus, omnis officio stupet |
| 118 | navita relicto, remus effugit manus. |
| 119 | in vota miseros ultimus cogit timor |
| 120 | eademque superos Troes et Danai rogant. |
| 121 | quid fata possunt! invidet Pyrrhus patri, |
| 122 | Aiaci Ulixes, Hectori Atrides minor, |
| 123 | Agamemno Priamo: quisquis ad Troiam iacet |
| 124 | felix vocatur, cadere qui meruit gradu, |
| 125 | quem fama servat, victa quem tellus tegit. |
| 126 | 'Nil nobile ausos pontus atque undae ferent? |
| 127 | ignava fortes fata consument viros? |
| 128 | perdenda mors est? quisquis es, nondum malis |
| 129 | satiate tantis, caelitum, tandem tuum |
| 130 | numen serena: cladibus nostris daret |
| 131 | vel Troia lacrimas. odia si durant tua |
| 132 | placetque mitti Doricum exitio genus, |
| 133 | quid hos simul perire nobiscum iuvat, |
| 134 | quibus perimus? sistite infestum mare: |
| 135 | vehit ista Danaos classis? et Troas vehit!' |
| 136 | nec plura possunt: occupat vocem mare. |
| 137 | Ecce alia clades. fulmine irati Iovis |
| 138 | armata Pallas quidquid aut hasta minax |
| 139 | aut aegide et furore Gorgoneo potest, |
| 140 | hoc igne patrio temptat, et caelo novae |
| 141 | spirant procellae. solus invictus malis |
| 142 | luctatur Aiax. vela cogentem hunc sua |
| 143 | tento rudente flamma perstrinxit cadens. |
| 144 | libratur aliud fulmen: hoc toto impetu |
| 145 | certum reducta Pallas excussit manu, |
| 146 | imitata patrem. transit Aiacem et ratem |
| 147 | ratisque partem secum et Aiacem tulit. |
| 148 | nil ille motus, ardua ut cautes, salo |
| 149 | ambustus extat, dirimit insanum mare |
| 150 | fluctusque rumpit pectore et navem manu |
| 151 | complexus ignes traxit et caeco mari |
| 152 | conlucet Aiax; omne resplendet fretum. |
| 153 | Tandem occupata rupe furibundum intonat: |
| 154 | 'superasse ~nunc pelagus atque ignes iuvat, |
| 155 | vicisse caelum Palladem fulmen mare. |
| 156 | non me fugavit bellici terror dei, |
| 157 | [et Hectorem una solus et Martem tuli] |
| 158 | Phoebea nec me tela pepulerunt gradu: |
| 159 | cum Phrygibus istos vicimus -- tene horream |
| 160 | aliena inerti tela iaculantem manu? |
| 161 | quid si ipse mittat?' plura cum auderet furens, |
| 162 | tridente rupem subruit pulsam pater |
| 163 | Neptunus imis exerens undis caput |
| 164 | solvitque montem; quem cadens secum tulit |
| 165 | terraque et igne victus et pelago iacet. |
| 166 | Nos alia maior naufragos pestis vocat. |
| 167 | est humilis unda, scrupeis mendax vadis, |
| 168 | ubi saxa rapidis clausa verticibus tegit |
| 169 | fallax Caphereus; aestuat scopulis fretum |
| 170 | fervetque semper fluctus alterna vice. |
| 171 | arx imminet praerupta quae spectat mare |
| 172 | utrimque geminum: Pelopis hinc oras tui |
| 173 | et Isthmon, arto qui recurvatus solo |
| 174 | Ionia iungi maria Phrixeis vetat, |
| 175 | hinc scelere Lemnon nobilem, hinc Anthedona |
| 176 | tardamque ratibus Aulida: hanc arcem occupat |
| 177 | Palamedis ille genitor et clarum manu |
| 178 | lumen nefanda vertice e summo efferens |
| 179 | in saxa ducit perfida classem face. |
| 180 | haerent acutis rupibus fixae rates; |
| 181 | has inopis undae brevia comminuunt vada, |
| 182 | pars vehitur huius prima, pars scopulo sedet; |
| 183 | hanc alia retro spatia relegentem ferit |
| 184 | et fracta frangit. iam timent terram rates |
| 185 | et maria malunt. cecidit in lucem furor: |
| 186 | postquam litatum est Ilio, Phoebus redit |
| 187 | et damna noctis tristis ostendit dies. |
| 188 | Clyt. Utrumne doleam laeter an reducem virum? |
| 189 | remeasse laetor, vulnus et regni grave |
| 190 | lugere cogor. redde iam Grais, pater |
| 191 | altisona quatiens regna, placatos deos. |
| 192 | nunc omne laeta fronde veletur caput, |
| 193 | sacrifica dulces tibia effundat modos |
| 194 | et nivea magnas victima ante aras cadat. |
| 195 | Sed ecce, turba tristis incomptae comas |
| 196 | Iliades adsunt, quas super celso gradu |
| 197 | effrena Phoebas entheas laurus quatit. |