| 1 | A solis ortus cardine Ad usque terrae limitem Christum canamus principem, Natum Maria virgine. |
| 2 | Beatus saeculi Servile corpus induit, Ut, carne carnem liberans, Ne perderet, quos condidit. |
| 3 | Clausae parentis viscera Coelestis intrat gratia, Venter puellae baiulat Secreta, quae non noverat. |
| 4 | Domus pudici pectoris Templum repente fit Dei, Intacta nesciens virum Virgo creavit filium. |
| 5 | Enixa est puerpera, Quem Gabriel praedixerat, Quem matris alvo gestiens Clausus Ioannes senserat. |
| 6 | Feno iacere pertulit, Praesepe non abhorruit, Parvoque lacte pastus est, Per quem nec ales esurit. |
| 7 | Gaudet chorus coelestium, Et angeli canunt Deo, Palamque fit pastoribus Pastor, creator omnium. |
| 8 | Hostis Herodes impie, Christum venire quid times? Non eripit mortalia, Qui regna dat coelestia. |
| 9 | Ibant Magi, quam viderant, Stellam sequentes praeviam; Lumen requirunt lumine; Deum fatentur munere. |
| 10 | Katerva matrum personat, Collisa deflens pignora, Quorum tyrannus millia Christo sacravit victimam. |
| 11 | Lavacra puri gurgitis Coelestis agnus attigit, Peccata, quae non detulit, Nos abluendo, sustulit. |
| 12 | Miraculis dedit fidem, Habere se Deum patrem, Infirma sanans corpora, Et suscitans cadavera. |
| 13 | Novum genus potentiae! Aquae rubescunt hydriae, Vinumque iussa fundere Mutavit unda originem. |
| 14 | Orat salutem servulo Nixus genu centurio, Credentis ardor plurimus Exstinxit ignes febrium. |
| 15 | Petrus per undas ambulat Christi levatus dextera: Natura quam negaverat, Fides paravit semitam. |
| 16 | Quarta die iam fetidus Vitam recepit Lazarus, Mortisque liber vinculis Factus superstes est sibi. |
| 17 | Rivos cruoris torridi Contacta vestis obstruit, Fletu rigantis supplicis Arent fluenta sanguinis. |
| 18 | Solutus omni corpore, Iussus repente surgere, Suis vicissim gressibus Aeger vehebat lectulum. |
| 19 | Tunc ille Iudas carnifex Ausus magistrum tradere, Pacem ferebat osculo, Quam non habebat pectore. |
| 20 | Verax datur fallacibus, Pium flagellat impius, Crucique fixus innocens Coniungitur latronibus. |
| 21 | Xristo myron post sabbatum Quaedam vehebant compares; Quas allocutus Angelus, Vivum sepulcro non tegi. |
| 22 | Ymnis venite dulcibus Omnes canamus subditum Christi triumpho tartarum, Qui nos redemit venditus. |
| 23 | Zelum draconis invidi, Et os leonis pessimi Calcavit unicus Dei, Seseque coelis reddidit. |