| 1 | Cantemus, socii, Domino cantemus honorem, Dulcis amor Christi personet ore pio. |
| 2 | Primus ad ima ruit magna de luce superbus, Sic homo, cum tumuit, primus ad ima ruit. |
| 3 | Unius ob meritum cuncti perire minores, Salvantur cuncti unius ob meritum. |
| 4 | Sola fuit mulier, patuit qua ianua letho: Et qua vita redit, sola fuit mulier. |
| 5 | Frater iniquus erat iustum qui perculit olim, Damnator Christi frater iniquus erat. |
| 6 | Transitus ille monet, quid prima amisit origo, Quid ventura parent, transitus ille monet. |
| 7 | Arca levatur aquis, homines ne perderet aequor, Ne pereant homines, arca levatur aquis. |
| 8 | Sume, pater, populos pro nati vulnere cunctos Cum tradis Christum, sume, pater, populos. |
| 9 | Hostia summa Patris, tacitis signata figuris; Quam referat Christus, hostia summa Patris. |
| 10 | Claudicat ecce videns Dominum, dum praevalet, heros, Aspera gens Christum claudicat ecce videns. |
| 11 | Reppulit ille famem, venitus crimine fratrum: Venditus est Christus, reppulit ille famem. |
| 12 | Perfide, corde peris, dum vastant omnia plagae, Dum cessant plagae, perfide, corde peris. |
| 13 | Agnus ab hoste sacer revocavit sanguine patres, Sanguine nosque refert agnus ab hoste sacer. |
| 14 | Obruit unda nefas, populo gradiente per aequor, Nunc mundi populis obruit unda nefas. |
| 15 | Murmurat impietas, manna veniente refecta, Panis adest Christus, murmurat impietas. |
| 16 | Plebs sibi dura caput terrae cultoris adoptat, Abstulit, heu! Christum plebs sibi dura caput. |
| 17 | Lex dedit indicium veteris de crimine poenae, Quodque salus veniat, lex dedit indicium. |
| 18 | En lapis irriguus, satiare, incredule, fonte: Qui Christum reprobas, en lapis irriguus. |
| 19 | Carpitur igne sacro munus, votumque piorum, Seditiosa tribus carpitur igne sacro. |
| 20 | Regna beata Patris legis non contigit haeres, Iesus dispensat regna beata Patris. |
| 21 | Destruit arca Dei, muros dum circuit, hostem, Sic hostem mundi destruit arca Dei. |
| 22 | Area vellus habet, madido sed vellere sicca est, Siccum tota madens area vellus habet. |
| 23 | Vincis honore Dei promisso in munere gentes, Affectum natae vincis honore Dei. |
| 24 | Tu decus omne tuis, qui sternis caede Goliam; Qui vincis mundum, tu decus omne tuis. |
| 25 | Maxima dona Dei cuncti cecinere prophetae, Implevit Christus maxima dona Dei. |
| 26 | Pondera dura tulit mandatum legis, et iram, Gratia mandati pondera dura tulit. |
| 27 | Virgo Maria nitet, nullo temerante pudore, Post partum pueri virgo Maria nitet. |
| 28 | Filius hic hominis fit maxima quaestio mundi, Nobiscum Deus est filius hic hominis. |
| 29 | Gaudia magna Dei mundus percepit, et ambit, Respuit, heu! mundus gaudia magna Dei. |
| 30 | Signa movent populos, cernunt magnalia caeci, Nulla tamen duros signa movent populos. |
| 31 | Aspera mors populis ligno deducta cucurrit, Aufertur ligno aspera mors populis. |
| 32 | Ipse tulit Dominus pro poenis munera servis, Pro servis poenas ipse tulit Dominus. |
| 33 | Vita beata necem miseris avertere venit, Pertulit a miseris vita beata necem. |
| 34 | Lumen adesse Dei, persensit tartarus ingens. |
| 35 | Nec cernunt homines, lumen adesse Dei. |
| 36 | Mors fera per hominem miserum sibi subdidit orbem, Subdita congemuit mors fera per hominem. |
| 37 | Suscitat ecce genus morti pater ille profanus, Ad vitam Christus suscitat ecce genus. |
| 38 | Hic populus Dominum dura cervice negavit, Suscepit primus hic populus Dominum. |
| 39 | Sanguine laeta redit fuso gens impia Christi, Gustato Christi sanguine laeta redit. |
| 40 | Crimina cuncta suis terrenus contulit auctor, Dissolvit Christus crimina cuncta suis. |
| 41 | Libera corda sibi facinus devinxerat olim, Nunc reficit Christus libera corda sibi. |
| 42 | Fortia vincla dedit peccati saeva potestas, Dulcis amor Christi fortia vincla dedit. |
| 43 | Iam super astra sedet, cuncti exsultate fideles: Perfide, quid saevis? iam super astra sedet. |
| 44 | Mortuus ille tonat, coelum, terramque subegit: Quid facient hostes? mortuus ille tonat. |
| 45 | Pellitur umbra die, Christo veniente figura, Christus adit gentes, pellitur umbra die. |
| 46 | Te properare docent et signa, et saecula prima, Nos sacra quae gerimus, te properare docent. |
| 47 | Unicus adveniens firmavit vota primorum, Vota dedit nobis unicus adveniens. |
| 48 | Passio, Christe, tui complevit munera legis, Munera nostra replet passio, Christe, tui. |
| 49 | Hic homo, qui Deus est, spes est antiqua piorum, Spes in fine piis hic homo, qui Deus est. |
| 50 | Munus erit fidei toto credentibus aevo, Qui dedit, ut credant, munus erit fidei. |
| 51 | Te veniente, Deus, mundanus concidit error, Occidit hic mundus, te veniente, Deus. |
| 52 | Gratia plena Dei est, quae totis gentibus exstat, Abscedant sectae, gratia plena Dei est. |
| 53 | Sola columba redit, quae totum circuit orbem, Discedant corvi, sola columba redit. |
| 54 | Adveniet Dominus dare digna piis, mala pravis, Credite iam, miseri, adveniet Dominus. |
| 55 | Visio, Christe, tui tormentum, et poena malorum est, Gloria cuncta bonis visio, Christe, tui. |
| 56 | Gloria magna Patri, semper tibi gloria, nate, Cum sancto Spiritu gloria magna Patri. |