Propertius, Elegiae, 4, IX
| 1 | Amphitryoniades qua tempestate iuuencos |
| 2 | egerat a stabulis, o Erythea, tuis, |
| 3 | venit ad invictos pecorosa Palatia montis, |
| 4 | et statuit fessos fessus et ipse boves, |
| 5 | qua Velabra suo stagnabant flumine quoque |
| 6 | nauta per urbanas velificabat aquas. |
| 7 | sed non infido manserunt hospite Caco |
| 8 | incolumes: furto polluit ille Iovem. |
| 9 | incola Cacus erat, metuendo raptor ab antro, |
| 10 | per tria partitos qui dabat ora sonos. |
| 11 | hic, ne certa forent manifestae signa rapinae, |
| 12 | aversos cauda traxit in antra boves, |
| 13 | nec sine teste deo: furem sonuere iuuenci, |
| 14 | furis et implacidas diruit ira fores. |
| 15 | Maenalio iacuit pulsus tria tempora ramo |
| 16 | Cacus, et Alcides sic ait: "ite, boves, |
| 17 | Herculis ite boves, nostrae labor ultime clavae, |
| 18 | bis mihi quaesitae, bis mea praeda, boves, |
| 19 | arvaque mugitu sancite Bovaria longo: |
| 20 | nobile erit Romae pascua vestra Forum." |
| 21 | dixerat, et sicco torquet sitis ora palato, |
| 22 | terraque non ullas feta ministrat aquas. |
| 23 | sed procul inclusas audit ridere puellas, |
| 24 | lucus ubi umbroso fecerat orbe nemus, |
| 25 | femineae loca clausa deae fontesque piandos |
| 26 | impune et nullis sacra retecta viris. |
| 27 | devia puniceae velabant limina vittae, |
| 28 | putris odorato luxerat igne casa, |
| 29 | populus et longis ornabat frondibus aedem, |
| 30 | multaque cantantis umbra tegebat avis. |
| 31 | huc ruit in siccam congesta pulvere barbam, |
| 32 | et iacit ante fores verba minora deo: |
| 33 | "vos precor, o luci sacro quae luditis antro, |
| 34 | pandite defessis hospita fana viris. |
| 35 | fontis egens erro circaque sonantia lymphis; |
| 36 | et cava succepto flumine palma sat est. |
| 37 | audistisne aliquem, tergo qui sustulit orbem? |
| 38 | ille ego sum: Alciden terra recepta vocat. |
| 39 | quis facta Herculeae non audit fortia clavae |
| 40 | et numquam ad vastas irrita tela feras, |
| 41 | atque uni Stygias homini luxisse tenebras? |
| 42 | [accipit: haec fesso vix mihi terra patet.] |
| 43 | quodsi Iunoni sacrum faceretis amarae, |
| 44 | non clausisset aquas ipsa noverca suas. |
| 45 | sin aliquem vultusque meus saetaeque leonis |
| 46 | terrent et Libyco sole perusta coma, |
| 47 | idem ego Sidonia feci servilia palla |
| 48 | officia et Lydo pensa diurna colo, |
| 49 | mollis et hirsutum cepit mihi fascia pectus, |
| 50 | et manibus duris apta puella fui." |
| 51 | talibus Alcides; at talibus alma sacerdos |
| 52 | puniceo canas stamine vincta comas: |
| 53 | "parce oculis, hospes, lucoque abscede uerendo; |
| 54 | cede agedum et tuta limina linque fuga. |
| 55 | interdicta viris metuenda lege piatur |
| 56 | quae se summota vindicat ara casa. |
| 57 | magno Tiresias aspexit Pallada vates, |
| 58 | fortia dum posita Gorgone membra lavat. |
| 59 | di tibi dent alios fontis: haec lympha puellis |
| 60 | avia secreti limitis unda fluit." |
| 61 | sic anus: ille umeris postis concussit opacos, |
| 62 | nec tulit iratam ianua clausa sitim. |
| 63 | at postquam exhausto iam flumine vicerat aestum, |
| 64 | ponit vix siccis tristia iura labris: |
| 65 | "angulus hic mundi nunc me mea fata trahentem |
| 66 | accipit: haec fesso vix mihi terra patet. |
| 67 | Maxima quae gregibus devota est Ara repertis, |
| 68 | ara per has" inquit "maxima facta manus, |
| 69 | haec nullis umquam pateat veneranda puellis, |
| 70 | Herculis aeternum nec sit inulta sitis." |
| 71 | hunc, quoniam manibus purgatum sanxerat orbem, |
| 72 | sic Sanctum Tatiae composuere Cures. |
| 73 | Sancte pater salve, cui iam favet aspera Iuno: |
| 74 | Sancte, velis libro dexter inesse meo. |