| 1 | Obicitur totiens a te mihi nostra libido: |
| 2 | crede mihi, vobis imperat ista magis. |
| 3 | vos, ubi contempti rupistis frena pudoris, |
| 4 | nescitis captae mentis habere modum. |
| 5 | flamma per incensas citius sedetur aristas, |
| 6 | fluminaque ad fontis sint reditura caput, |
| 7 | et placidum Syrtes portum et bona litora nautis |
| 8 | praebeat hospitio saeva Malea suo, |
| 9 | quam possit vestros quisquam reprehendere cursus |
| 10 | et rabidae stimulos frangere nequitiae. |
| 11 | testis, Cretaei fastus quae passa iuvenci |
| 12 | induit abiegnae cornua falsa bovis; |
| 13 | testis Thessalico flagrans Salmonis Enipeo, |
| 14 | quae voluit liquido tota subire deo. |
| 15 | crimen et illa fuit, patria succensa senecta |
| 16 | arboris in frondes condita Myrrha novae. |
| 17 | nam quid Medeae referam, quo tempore matris |
| 18 | iram natorum caede piavit amor? |
| 19 | quidve Clytaemestrae, propter quam tota Mycenis |
| 20 | infamis stupro stat Pelopea domus? |
| 21 | tuque, o, Minoa venumdata, Scylla, figura |
| 22 | tondes purpurea regna paterna coma. |
| 23 | hanc igitur dotem virgo desponderat hosti! |
| 24 | Nise, tuas portas fraude reclusit amor. |
| 25 | at vos, innuptae, felicius urite taedas: |
| 26 | pendet Cretaea tracta puella rate. |
| 27 | non tamen immerito Minos sedet arbiter Orci: |
| 28 | victor erat quamvis, aequus in hoste fuit. |