Propertius, Elegiae, 3, I
| 1 | Callimachi Manes et Coi sacra Philitae, |
| 2 | in vestrum, quaeso, me sinite ire nemus. |
| 3 | primus ego ingredior puro de fonte sacerdos |
| 4 | Itala per Graios orgia ferre choros. |
| 5 | dicite, quo pariter carmen tenuastis in antro |
| 6 | quove pede ingressi? quamve bibistis aquam? |
| 7 | ah valeat, Phoebum quicumque moratur in armis! |
| 8 | exactus tenui pumice versus eat, |
| 9 | quo me Fama levat terra sublimis, et a me |
| 10 | nata coronatis Musa triumphat equis, |
| 11 | et mecum in curru parvi vectantur Amores, |
| 12 | scriptorumque meas turba secuta rotas. |
| 13 | quid frustra immissis mecum certatis habenis? |
| 14 | non datur ad Musas currere lata via. |
| 15 | multi, Roma, tuas laudes annalibus addent, |
| 16 | qui finem imperii Bactra futura canent. |
| 17 | sed, quod pace legas, opus hoc de monte Sororum |
| 18 | detulit intacta pagina nostra via. |
| 19 | mollia, Pegasides, date vestro serta poetae: |
| 20 | non faciet capiti dura corona meo. |
| 21 | at mihi quod vivo detraxerit invida turba, |
| 22 | post obitum duplici faenore reddet Honos; |
| 23 | omnia post obitum fingit maiora vetustas: |
| 24 | maius ab exsequiis nomen in ora venit. |
| 25 | nam quis equo pulsas abiegno nosceret arces, |
| 26 | fluminaque Haemonio comminus isse viro, |
| 27 | Idaeum Simoenta Iovis cum prole Scamandro, |
| 28 | Hectora per campos ter maculasse rotas? |
| 29 | Deiphobumque Helenumque et Pulydamantis in armis |
| 30 | qualemcumque Parim vix sua nosset humus. |
| 31 | exiguo sermone fores nunc, Ilion, et tu |
| 32 | Troia bis Oetaei numine capta dei. |
| 33 | nec non ille tui casus memorator Homerus |
| 34 | posteritate suum crescere sensit opus; |
| 35 | meque inter seros laudabit Roma nepotes: |
| 36 | illum post cineres auguror ipse diem. |
| 37 | ne mea contempto lapis indicet ossa sepulcro |
| 38 | provisumst Lycio vota probante deo. |