Propertius, Elegiae, 2, XXIIa
| 1 | Scis here mi multas pariter placuisse puellas; |
| 2 | scis mihi, Demophoon, multa venire mala. |
| 3 | nulla meis frustra lustrantur compita plantis; |
| 4 | o nimis exitio nata theatra meo, |
| 5 | sive aliquis molli diducit candida gestu |
| 6 | bracchia, seu varios incinit ore modos! |
| 7 | interea nostri quaerunt sibi vulnus ocelli, |
| 8 | candida non tecto pectore si qua sedet, |
| 9 | sive vagi crines puris in frontibus errant, |
| 10 | Indica quos medio vertice gemma tenet. |
| 11 | quae si forte aliquid vultu mihi dura negarat, |
| 12 | frigida de tota fronte cadebat aqua. |
| 13 | quaeris, Demophoon, cur sim tam mollis in omnis? |
| 14 | quod quaeris, 'quare' non habet ullus amor. |
| 15 | cur aliquis sacris laniat sua bracchia cultris |
| 16 | et Phrygis insanos caeditur ad numeros? |
| 17 | uni cuique dedit vitium natura creato: |
| 18 | mi fortuna aliquid semper amare dedit. |
| 19 | me licet et Thamyrae cantoris fata sequantur, |
| 20 | numquam ad formosas, invide, caecus ero. |
| 21 | sed tibi si exilis videor tenuatus in artus, |
| 22 | falleris: haud umquam est culta labore Venus. |
| 23 | percontere licet: saepe est experta puella |
| 24 | officium tota nocte valere meum. |
| 25 | Iuppiter Alcmenae geminas requieverat Arctos, |
| 26 | et caelum noctu bis sine rege fuit; |
| 27 | nec tamen idcirco languens ad fulmina venit: |
| 28 | nullus amor vires eripit ipse suas. |
| 29 | quid? cum e complexu Briseidos iret Achilles, |
| 30 | num fugere minus Thessala tela Phryges? |
| 31 | quid? ferus Andromachae lecto cum surgeret Hector? |
| 32 | bella Mycenaeae non timuere rates? |
| 33 | ille vel hic classis poterant vel perdere muros: |
| 34 | hic ego Pelides, hic ferus Hector ego. |
| 35 | aspice uti caelo modo sol modo luna ministret: |
| 36 | sic etiam nobis una puella parum est. |
| 37 | altera me cupidis teneat foveatque lacertis, |
| 38 | altera si quando non sinit esse locum; |
| 39 | aut si forte irata meo sit facta ministro, |
| 40 | ut sciat esse aliam, quae velit esse mea! |
| 41 | nam melius duo defendunt retinacula navim, |
| 42 | tutius et geminos anxia mater alit. |