Propertius, Elegiae, 2, XVIIIc
| 1 | NUNC etiam infectos demens imitare Britannos, |
| 2 | ludis et externo tincta nitore caput? |
| 3 | ut natura dedit, sic omnis recta figura est: |
| 4 | turpis Romano Belgicus ore color. |
| 5 | illi sub terris fiant mala multa puellae, |
| 6 | quae mentita suas vertit inepta comas! |
| 7 | deme: mihi certe poteris formosa videri, |
| 8 | mi formosa sat es, si modo saepe venis. |
| 9 | an si caeruleo quaedam sua tempora fuco |
| 10 | tinxerit, idcirco caerula forma bona est? |
| 11 | cum tibi nec frater nec sit tibi filius ullus, |
| 12 | frater ego et tibi sim filius unus ego. |
| 13 | ipse tuus semper tibi sit custodia lectus, |
| 14 | nec nimis ornata fronte sedere velis. |
| 15 | credam ego narranti, noli committere, famae: |
| 16 | et terram mmor transilit et maria. |