Plautus, Truculentus, 3, Scaena II. Truculentus Astaphium Stratophanes
| 1 | TRUC. Mirum videtur, rure erilem filium |
| 2 | Strabacem non rediisse; nisi si clanculum |
| 3 | conlapsus est hic in corruptelam suam. |
| 4 | AST. Iam pol illic inclamabit me si aspexerit. |
| 5 | TRUC. Nimio minus saevos iam sum, Astaphium, quam fui, |
| 6 | iam non <ego> sum truculentus, noli metuere. |
| 7 | AST. Quid vis? quid metuam? tuam expecto truculentiam. |
| 8 | TRUC. Dic impera mihi quid libet quo vis modo. |
| 9 | novos omnis mores habeo, veteres perdidi. |
| 10 | vel amare possum vel iam scortum ducere. |
| 11 | AST. Lepide mecastor nuntias. sed dic mihi, |
| 12 | haben - TRUC. Marsipum te fortasse dicere? |
| 13 | AST. Intellexisti lepide quid ego dicerem. |
| 14 | STRAT. Heus tu, iam postquam in urbem crebro commeo, |
| 15 | dicax sum factus. iam sum caullator probus. |
| 16 | AST. Quid id est, amabo? istaec ridicularia, |
| 17 | cavillationes, vis opinor dicere? |
| 18 | STRAT. Istud pauxillum differt a cavillibus. |
| 19 | AST. Sequere intro [me], amabo, mea voluptas. STRAT. Tene hoc tibi: |
| 20 | rabonem habeto, ut mecum hanc noctem sies. |
| 21 | AST. Perii, rabonem? quam esse dicam hanc belvam? |
| 22 | quin tu arrabonem dicis? STRAT. 'A' facio lucri, |
| 23 | ut Praenestinis conia est ciconia. |
| 24 | AST. Sequere, obsecro. STRAT. Strabacem hic opperiar modo, |
| 25 | si rure veniat. AST. Is quidem hic apud nos est Strabax, |
| 26 | modo rure venit. STRAT. Priusne quam ad matrem suam? |
| 27 | eu edepol hominem nihili. AST. Iamne autem ut soles? |
| 28 | STRAT. Iamne nihil dico? AST. I intro, amabo, cedo manum. |
| 29 | STRAT. Tene. in tabernam ducor devorsoriam, |
| 30 | ubi male accipiar mea mihi pecunia.— |