Plautus, Truculentus, 2, Scaena IV. Phronesium Diniarchus
| 1 | PHRON. Num tibi nam, amabo, ianua est mordax mea, |
| 2 | quo intro ire metuas, mea voluptas? DIN. Ver vide, |
| 3 | ut tota floret, ut olet, ut nitide nitet. |
| 4 | PHRON. Quid tam inficetus, Lemno adveniens qui tuae |
| 5 | non des amicae, Diniarche, savium? |
| 6 | DIN. Vah, vapulo hercle ego nunc, atque adeo male. |
| 7 | PHRON. Quo te avortisti? DIN. Salva sis, Phronesium. |
| 8 | PHRON. Salve. hicine hodie cenas, salvos cum advenis? |
| 9 | DIN. Promisi. PHRON. Ubi cenabis? DIN. Ubi tu iusseris. |
| 10 | PHRON. Hic me lubente facies. DIN. Edepol me magis. |
| 11 | nempe tu eris hodie mecum, mea Phronesium? |
| 12 | PHRON. Velim, si fieri possit. DIN. Cedo soleas mihi, |
| 13 | properate, auferte mensam. PHRON. Amabo, sanun es? |
| 14 | DIN. Non edepol bibere possum iam, ita animo malest. |
| 15 | PHRON. Mane, aliquid fiet, ne abi. DIN. Ah, aspersisti aquam. |
| 16 | iam rediit animus. deme soleas, cedo bibam. |
| 17 | PHRON. Idem es mecastor qui soles. sed dic mihi, |
| 18 | benene ambulatumst? DIN. Huc quidem hercle ad te bene, |
| 19 | quia tui videndi copia est. PHRON. Complectere. |
| 20 | DIN. Lubens. heia, hoc est melle dulci dulcius. |
| 21 | hoc tuis fortunis, Iuppiter, praestant meae. |
| 22 | PHRON. Dan savium? DIN. Immo vel decem. PHRON. Em istoc pauper es: |
| 23 | <semper> plus pollicere quam ego abs te postulo. |
| 24 | DIN. Utinam a principio rei item parsisses meae |
| 25 | ut nunc reparcis saviis. PHRON. Si quid tibi |
| 26 | compendi facere possim, factum edepol velim. |
| 27 | DIN. Iam lauta es? PHRON. Iam pol mihi quidem atque oculis meis. |
| 28 | num tibi sordere videor? DIN. Non pol mihi quidem; |
| 29 | verum tempestas, memini, quondam <etiam> fuit, |
| 30 | cum inter nos sordebamus alter de altero. |
| 31 | sed quid ego facinus audivi adveniens tuom, |
| 32 | quod tu hic me absente novi negoti gesseris? |
| 33 | PHRON. Quid id est? DIN. Primumdum, cum tu es aucta liberis |
| 34 | cumque bene provenisti salva, gaudeo. |
| 35 | PHRON. Concedite hinc vos intro atque operite ostium. |
| 36 | tu nunc superstes solus sermoni meo es. |
| 37 | tibi mea consilia summa semper credidi. |
| 38 | equidem neque peperi puerum neque praegnas fui; |
| 39 | verum adsimulavi me esse praegnatem: haud nego. |
| 40 | DIN. Quem propter, o mea vita? PHRON. Propter militem |
| 41 | Babyloniensem, qui quasi uxorem sibi |
| 42 | me habebat anno, dum hic fuit. DIN. Ego senseram. |
| 43 | sed quid istuc? cui rei te adsimulare retulit? |
| 44 | PHRON. Ut esset aliquis laqueus et redimiculum, |
| 45 | reversionem ut ad me faceret denuo. |
| 46 | nunc huc remisit nuper ad me epistulam, |
| 47 | sese experturum quanti sese penderem: |
| 48 | si quod peperissem id <non> necarem ac tollerem, |
| 49 | bona sua med habiturum omnia [esse]. DIN. Ausculto lubens. |
| 50 | quid denique agitis? PHRON. Mater ancillas iubet, |
| 51 | quoniam iam decimus mensis adventat prope, |
| 52 | aliam aliorsum ire, praemandare et quaerere |
| 53 | puerum aut puellam, qui supponatur mihi. |
| 54 | quid multa verba faciam? tonstricem Suram |
| 55 | novisti nostram, quae mercedem sese habet? |
| 56 | DIN. Novi. PHRON. Haec ut opera circumit, per familias, |
| 57 | puerum vestigat; clanculum ad me detulit, |
| 58 | datum sibi esse dixit. DIN. O mercis malae. |
| 59 | eum nunc non illa peperit, quae peperit prior, |
| 60 | sed tu posterior. PHRON. Ordine omnem rem tenes. |
| 61 | nunc ut praemisit nuntium miles mihi, |
| 62 | non multo post hic aderit. DIN. Nunc tu te interim |
| 63 | quasi pro puerpera hic procuras? PHRON. Quippini, |
| 64 | ubi sine labore res geri pulcre potest? |
| 65 | ad suom quemque aequom est quaestum esse callidum. |
| 66 | DIN. Quid me futurum est, quando miles venerit? |
| 67 | relictusne abs te vivam? PHRON. Ubi illud quod volo |
| 68 | habebo ab illo, facile inveniam quo modo |
| 69 | divortium et discordiam inter nos parem: |
| 70 | post id ego [totum] tecum, mea voluptas, usque ero |
| 71 | assiduo. DIN. Immo hercle vero accubuo mavelim. |
| 72 | PHRON. [quin] Dis hodie sacruficare pro puero volo, |
| 73 | quinto die quod fieri oportet. DIN. Censeo. |
| 74 | PHRON. Non audes aliquid mihi dare munusculum? |
| 75 | DIN. Lucrum hercle videor facere mi, voluptas mea, |
| 76 | ubi quippiam me poscis. PHRON. At ego, ubi abstuli. |
| 77 | DIN. Iam faxo hic aderit. servolum huc mittam meum. |
| 78 | PHRON. Sic facito. DIN. Quidquid attulerit, boni consulas. |
| 79 | PHRON. Ecastor munus te curaturum scio, |
| 80 | ut cuius me non paeniteat mittatur mihi. |
| 81 | DIN. Num quippiam aliud me vis? PHRON. Ut quando otium |
| 82 | tibi sit ad me revisas, <et> valeas - DIN. Vale. |
| 83 | pro di immortales, non amantis mulieris, |
| 84 | sed sociae unanimantis, fidentis fuit |
| 85 | officium facere quod modo haec fecit mihi, |
| 86 | suppositionem pueri quae mihi credidit, |
| 87 | germanae quod sorori non credit soror. |
| 88 | ostendit sese iam mihi medullitus: |
| 89 | scio mi infidelem numquam, dum vivat, fore. |
| 90 | egone illam ut non amem? egone illi ut non bene velim? |
| 91 | me potius non amabo quam huic desit amor. |
| 92 | ego isti non munus mittam? iam modo ex hoc loco |
| 93 | iubebo ad istam quinque deferri minas, |
| 94 | praeterea obsonari <una> dumtaxat mina. |
| 95 | multo illi potius bene erit quae bene volt mihi, |
| 96 | quam mihi, qui mihimet omnia facio mala. - |