Plautus, Rudens, 4, Scaena VI. Daemones Trachalio
| 1 | DAEM. Aliquando osculando meliust, uxor, pausam fieri; |
| 2 | atque adorna, ut rem divinam faciam, cum intro advenero, |
| 3 | Laribus familiaribus, cum auxerunt nostram familiam. |
| 4 | sunt domi agni et porci sacres. sed quid istum remoramini, |
| 5 | mulieres, Trachalionem? atque optime eccum exit foras. |
| 6 | TRACH. Ubi ubi erit, iam investigabo et mecum ad te adducam simul |
| 7 | Plesidippum. DAEM. Eloquere ut haec res optigit de filia; |
| 8 | eum roga, ut relinquat alias res et huc veniat. TRACH. Licet. |
| 9 | DAEM. Dicito daturum meam illi filiam uxorem. TRACH. Licet. |
| 10 | DAEM. Et patrem eius me novisse et mi esse cognatum. TRACH. Licet. |
| 11 | DAEM. Sed propera. TRACH. Licet. DAEM. Iam hic fac sit, cena ut curetur. TRACH. Licet. |
| 12 | DAEM. Omnian licet? TRACH. Licet. sed scin quid est quod te volo? |
| 13 | quod promisisti ut memineris, hodie ut liber sim. DAEM. Licet. |
| 14 | TRACH. Fac ut exores Plesidippum, ut me <manu> emittat. DAEM. Licet. |
| 15 | TRACH. Et tua filia facito oret: facile exorabit. DAEM. Licet. |
| 16 | TRACH. Atque ut mi Ampelisca nubat, ubi ego sim liber. DAEM. Licet. |
| 17 | TRACH. Atque ut gratum mi beneficium factis experiar. DAEM. Licet. |
| 18 | TRACH. Omnian licet? DAEM. Licet: tibi rursum refero gratiam. |
| 19 | sed propera ire in urbem actutum et recipe te huc rursum. TRACH. Licet. |
| 20 | iam hic ero. tu interibi adorna ceterum quod opust. - DAEM. Licet. |
| 21 | Hercules istum infelicet cum sua licentia; |
| 22 | ita meas replevit auris, quidquid memorabam, licet. |