Plautus, Rudens, 3, Scaena III. Palaestra Trachalio Ampelisca
| 1 | PAL. Nunc id est cum omnium copiarum atque opum, |
| 2 | auxili, praesidi viduitas nos tenet. |
| 3 | <nulla nunc> speculast quae salutem afferat, |
| 4 | <nec quam in> partem ingredi persequamur |
| 5 | <scimus: tanto> in metu nunc sumus ambae, |
| 6 | <tanta> importunitas tantaque iniuria |
| 7 | <facta in> nos est modo hic intus ab nostro ero, |
| 8 | qui scelestus sacerdotem anum praecipes |
| 9 | reppulit propulit perquam indignis modis |
| 10 | nosque ab signo intimo vi deripuit sua. |
| 11 | sed nunc sese ut ferunt res fortunaeque nostrae, |
| 12 | par moriri est. neque est melius morte in malis, |
| 13 | rebus miseris. TRACH. Quid est? quae illaec oratiost? |
| 14 | cesso ego has consolari? heus, Palaestra, PAL. Qui vocat? |
| 15 | TRACH. Ampelisca. AMP. Obsecro, quis est qui vocat? |
| 16 | PAL. Quis is est qui nominat? TRACH. Si respexis, scies. |
| 17 | PAL. O salutis meae spes. TRACH. Tace ac bono animo es. |
| 18 | me vide. PAL. Si modo id liceat, vis ne opprimat, |
| 19 | quae vis vim mi afferam ipsa adigit. TRACH. Ah, desine, nimis inepta es. |
| 20 | PAL. Desiste dictis nunciam miseram me consolari; |
| 21 | nisi quid re praesidium apparas, Trachalio, acta haec res est. |
| 22 | AMP. Certumst moriri quam hunc pati <saevire> lenonem in me. |
| 23 | sed muliebri animo sum tamen: miserae <quom venit> in mentem |
| 24 | mihi mortis, metus membra occupat. edepol * hunc acerbum. |
| 25 | TRACH. Bonum animum habete. PAL. Nam, obsecro, unde animus mi invenitur? |
| 26 | TRACH. Ne, inquam, timete; adsidite hic in ara. AMP. Quid istaec ara |
| 27 | prodesse nobis <plus> potest quam signum in fano hic intus |
| 28 | Veneris, quod amplexae modo, unde abreptae per vim miserae? |
| 29 | TRACH. Sedete hic modo, ego hinc vos tamen tutabor. aram habete hanc |
| 30 | vobis pro castris, moenia hinc ego vos defensabo; |
| 31 | praesidio Veneris malitiae lenonis contra incedam. |
| 32 | PAL. Tibi auscultamus et, Venus alma, ambae te obsecramus, |
| 33 | aram amplexantes hanc tuam lacrumantes, genibus nixae, |
| 34 | in custodelam nos tuam ut recipias et tutere; |
| 35 | illos scelestos, qui tuom fecerunt fanum parvi, |
| 36 | fac ut ulciscare nosque ut hanc tua pace aram obsidere |
| 37 | patiare: elautae ambae sumus opera Neptuni noctu, |
| 38 | ne <invisas> habeas neve idcirco nobis vitio vortas, |
| 39 | si quippiamst, minus quod bene esse lautum tu arbitrare. |
| 40 | TRACH. Venus, aequom has petere intellego: decet abs te id impetrari; |
| 41 | ignoscere his te convenit: metus has id ut faciant subigit. |
| 42 | te ex concha natam esse autumant, cave tu harum conchas spernas. |
| 43 | sed optume eccum exit senex, patronus mihique et vobis. |