Plautus, Persa, 1, Scaena II. Sagaristio Toxilus
| 1 | SAG. Qui ero suo servire volt bene servos servitutem, |
| 2 | ne illum edepol multa in pectore suo conlocare oportet, |
| 3 | quae ero placere censeat praesenti atque apsenti suo. |
| 4 | ego neque lubenter servio neque satis sum ero ex sententia, |
| 5 | sed quasi lippo oculo me erus meus manum apstinere hau quit tamen, |
| 6 | quin mi imperet, quin me suis negotiis praefulciat. |
| 7 | TOX. Quis illic est qui contra me astat? SAG. Quis hic est qui sic contra me astat? |
| 8 | TOX. Similis est Sagaristionis. SAG. Toxilus hic quidem meus amicust. |
| 9 | TOX. Is est profecto. SAG. Eum esse opinor. TOX. Congrediar. SAG. |
| 10 | Contra adgredibor. |
| 11 | TOX. O Sagaristio, di ament te. SAG. O Toxile, dabunt di quae exoptes. |
| 12 | ut vales? TOX. Ut queo. SAG. Quid agitur? TOX. Vivitur. |
| 13 | SAG. Satin ergo ex sententia? TOX. Si eveniunt quae exopto, satis. |
| 14 | SAG. Nimis stulte amicis utere. TOX. Quid iam? SAG. Imperare oportet. |
| 15 | TOX. Mihi quidem tu iam eras mortuos, quia non te visitabam. |
| 16 | S. Negotium edepol - T. Ferreum fortasse? S. Plusculum annum |
| 17 | fui praeferratus apud molas tribunus vapularis. |
| 18 | TOX. Vetus iam istaec militiast tua. SAG. Satin tu usque valuisti? TOX. Hau probe. |
| 19 | SAG. Ergo edepol palles. TOX. Saucius factus sum in Veneris proelio: |
| 20 | sagitta Cupido cor meum transfixit. SAG. Iam servi hic amant? |
| 21 | TOX. Quid ego faciam? disne advorser? quasi Titani cum eis belligerem |
| 22 | quibus sat esse non queam? |
| 23 | SAG. Vide modo, ulmeae catapultae tuom ne transfigant latus. |
| 24 | TOX. Basilice agito eleutheria. |
| 25 | SAG. Quid iam? TOX. Quia erus peregri est. SAG. Ain tu, |
| 26 | peregri est? TOX. Si tu tibi bene esse |
| 27 | pote pati, veni: vives mecum, |
| 28 | basilico accipiere victu. |
| 29 | SAG. Vah, iam scapulae pruriunt, quia te istaec audivi loqui. |
| 30 | TOX. Sed hoc me unum excruciat. SAG. Quidnam id est? |
| 31 | TOX. Haec dies summa hodie est, mea amica sitne libera, |
| 32 | an sempiternam servitutem serviat. SAG. Quid nunc vis ergo? |
| 33 | TOX. Facere amicum tibi me potis es sempiternum. SAG. Quem ad modum? |
| 34 | TOX. Ut mihi des nummos sescentos, quos pro capite illius pendam, |
| 35 | quos continuo tibi reponam in hoc triduo, aut quadriduo. |
| 36 | age fi benignus, subveni. |
| 37 | SAG. Qua confidentia rogare tu a med argentum tantum audes, |
| 38 | impudens? quin si egomet totus veneam, vix recipi potis est |
| 39 | quod tu me rogas; nam tu aquam a pumice nunc postulas, |
| 40 | qui ipsus sitiat. TOX. Sicine hoc te mihi facere? SAG. Quid faciam? TOX. Rogas? |
| 41 | alicunde exora mutuom. SAG. Tu fac idem quod rogas me. |
| 42 | TOX. Quaesivi, nusquam repperi. SAG. Quaeram equidem, si quis credat. |
| 43 | TOX. Nempe habeo in mundo. SAG. Si id domi esset mihi, iam pollicerer: |
| 44 | hoc meumst ut faciam sedulo. TOX. Quidquid erit, recipe te ad me. |
| 45 | quaere tamen, ego item sedulo. SAG. Si quid erit, te faciam ut scias. |
| 46 | TOX. *** obsecro te resecroque, operam da hanc mihi |
| 47 | fidelem. SAG. Ah, odio me enicas. |
| 48 | TOX. Amoris vitio, non meo, nunc tibi morologus fio. |
| 49 | SAG. At pol ego aps te concessero. - TOX. Iamne abis? bene ambulato. |
| 50 | sed recipe quam primum potes, cave fuas mi in quaestione. |
| 51 | usque ero domi, dum excoxero lenoni malam <rem magnam>. - |