Plautus, Mostellaria, 2, Scaena III. Theopropides Tranio
| 1 | TH. Habeo, Neptune, gratiam magnam tibi, |
| 2 | quom med amisisti abs te vix vivom domum. |
| 3 | verum si posthac me pedem latum modo |
| 4 | scies imposisse in undam, hau causast, ilico |
| 5 | quod nunc voluisti facere quin facias mihi. |
| 6 | apage, apage te a me nunciam post hunc diem: |
| 7 | quod crediturus tibi fui, omne credidi. |
| 8 | TR. Edepol, Neptune, peccavisti largiter, |
| 9 | qui occasionem hanc amisisti tam bonam. |
| 10 | TH. Triennio post Aegypto advenio domum; |
| 11 | credo exspectatus veniam familiaribus. |
| 12 | TR. Nimio edepol ille potuit exspectatior |
| 13 | venire, qui te nuntiaret mortuom. |
| 14 | TH. Sed quid hoc? occlusa ianua est interdius. |
| 15 | pultabo. heus, ecquis intust? aperitin fores? |
| 16 | TR. Quis homo est, qui nostras aedes accessit prope? |
| 17 | TH. Meus servos hic quidem est Tranio. TR. O Theopropides, |
| 18 | ere, salve, salvom te advenisse gaudeo. |
| 19 | usquin valuisti? TH. Usque ut vides. TR. Factum optime. |
| 20 | TH. Quid vos? insanin estis? TR. Quidum? TH. Sic, quia |
| 21 | foris ambulatis, natus nemo in aedibus |
| 22 | servat, neque qui recludat neque quis respondeat. |
| 23 | pultando [pedibus] paene confregi hasce ambas <foris>. |
| 24 | TR. Eho an tu tetigisti has aedis? |
| 25 | TH. Cur non tangerem? |
| 26 | quin pultando, inquam, paene confregi foris. |
| 27 | TR. Tetigistin? TH. Tetigi, inquam, et pultavi. TR. Vah. TH. Quid est? |
| 28 | TR. Male hercle factum. TH. Quid est negoti? TR. Non potest |
| 29 | dici, quam indignum facinus fecisti et malum. |
| 30 | TH. Quid iam? TR. Fuge, obsecro, atque abscede ab aedibus. |
| 31 | fuge huc, fuge ad me propius. tetigistin foris? |
| 32 | TH. Quo modo pultare potui, si non tangerem? |
| 33 | TR. Occidisti hercle - TH. Quem mortalem? TR. Omnis tuos. |
| 34 | TH. Di te deaeque omnes faxint cum istoc omine - |
| 35 | TR. Metuo, te atque istos expiare ut possies. |
| 36 | TH. Quam ob rem? aut quam subito rem mihi adportas novam? |
| 37 | TR. Et heus, iube illos illinc ambo abscedere. |
| 38 | TH. Apscedite. TR. Aedes ne attigatis. tangite |
| 39 | vos quoque terram. TH. Obsecro hercle, quin eloquere |
| 40 | TR. Quia septem menses sunt, quom in hasce aedis pedem |
| 41 | nemo intro tetulit, semel ut emigravimus. |
| 42 | TH. Eloquere, quid ita? TR. Circumspicedum, numquis est, |
| 43 | sermonem nostrum qui aucupet? TH. Tutum probest. |
| 44 | TR. Circumspice etiam. TH. Nemo est. loquere nunciam. |
| 45 | TR. Capitale scelus est. TH. Quid est? non <satis> intellego. |
| 46 | TR. Scelus, inquam, factum est iam diu, antiquom et vetus. |
| 47 | TH. Antiquom? TR. Id adeo nos nunc factum invenimus. |
| 48 | TH. Quid istuc est sceleris? aut quis id fecit? cedo. |
| 49 | TR. Hospes necavit hospitem captum manu; |
| 50 | iste, ut ego opinor, qui has tibi aedis vendidit. |
| 51 | TH. Necavit? TR. Aurumque ei ademit hospiti |
| 52 | eumque hic defodit hospitem ibidem in aedibus. |
| 53 | TH. Quapropter id vos factum suspicamini? |
| 54 | TR. Ego dicam, ausculta. ut foris cenaverat |
| 55 | tuos gnatus, postquam rediit a cena domum, |
| 56 | abimus omnes cubitum; condormivimus: |
| 57 | lucernam forte oblitus fueram exstinguere; |
| 58 | atque ille exclamat derepente maximum. |
| 59 | TH. Quis homo? an gnatus meus? TR. St, tace, ausculta modo. |
| 60 | ait venisse illum in somnis ad se mortuom. |
| 61 | TH. Nempe ergo in somnis? TR. Ita. sed ausculta modo. |
| 62 | ait illum hoc pacto sibi dixisse mortuom. |
| 63 | TH. In somnis? TR. Mirum quin vigilanti diceret, |
| 64 | qui abhinc sexaginta annos occisus foret. |
| 65 | interdum inepte stultus es, <Theopropides>. |
| 66 | TH. Taceo. TR. Sed ecce quae illi in *** |
| 67 | 'ego transmarinus hospes sum Diapontius. |
| 68 | hic habito, haec mihi dedita est habitatio. |
| 69 | nam me Acheruntem recipere Orcus noluit, |
| 70 | quia praemature vita careo. per fidem |
| 71 | deceptus sum: hospes [hic] me necavit isque me |
| 72 | defodit insepultum clam [ibidem] in hisce aedibus, |
| 73 | scelestus, auri causa. nunc tu hinc emigra. |
| 74 | scelestae hae sunt aedes, impia est habitatio'. |
| 75 | quae hic monstra fiunt, anno vix possum eloqui. |
| 76 | TH. St, st. |
| 77 | TR. Quid, obsecro hercle, factum est? TH. Concrepuit foris. |
| 78 | TR. Hicin percussit! TH. Guttam haud habeo sanguinis, |
| 79 | vivom me accersunt Acheruntem mortui. |
| 80 | TR. Perii, illisce hodie hanc conturbabunt fabulam. |
| 81 | nimis quam formido, ne manifesto hic me opprimat. |
| 82 | TH. Quid tute tecum loquere? TR. Abscede ab ianua. |
| 83 | fuge, obsecro hercle. TH. Quo fugiam? etiam tu fuge. |
| 84 | TR. Nihil ego formido, pax mihi est cum mortuis. |
| 85 | INTUS. Heus, Tranio. TR. Non me appellabis, si sapis. |
| 86 | nihil ego commerui, neque istas percussi fores. |
| 87 | INTUS. Quaeso - <TR. Cave verbum faxis. TH. Dic> quid segreges |
| 88 | <sermonem. TR. Apage hinc te. TH. Quae res> te agitat, Tranio? |
| 89 | quicum istaec loquere? TR. An quaeso tu appellaveras? |
| 90 | ita me di amabunt, mortuom illum credidi |
| 91 | expostulare quia percussisses fores. |
| 92 | sed tu, etiamne astas nec quae dico optemperas? |
| 93 | TH. Quid faciam? TR. Cave respexis, fuge, [atque] operi caput. |
| 94 | TH. Cur non fugis tu? TR. Pax mihi est cum mortuis. |
| 95 | TH. Scio. quid modo igitur? cur tanto opere extimueras? |
| 96 | TR. Nil me curassis, inquam, ego mihi providero: |
| 97 | tu, ut occepisti, tantum quantum quis fuge, |
| 98 | atque Herculem invoca. TH. Hercules, ted invoco. - |
| 99 | TR. Et ego - tibi hodie ut det, senex, magnum malum. |
| 100 | pro di immortales, obsecro vestram fidem, |
| 101 | quid ego hodie negoti confeci mali. |