Plautus, Mostellaria, 1, Scaena IV. Callidamates Delphium Philolaches Philematium
| 1 | CALL. Adversum veniri mihi ad Philolachetem |
| 2 | volo temperi. audi, em tibi imperatum est. |
| 3 | nam illi ubi fui, inde effugi foras, |
| 4 | ita me ibi male convivi sermonisque taesumst. |
| 5 | nunc comissatum ibo ad Philolachetem, |
| 6 | ubi nos hilari ingenio et lepide accipient. |
| 7 | ecquid tibi videor mammamadere? |
| 8 | DEL. Semper istoc modo. |
| 9 | moratus tu te. <ire huc> debebas. |
| 10 | CALL. Visne ego te ac tu me amplectare? |
| 11 | DEL. Si tibi cordi est facere, licet. CALL. Lepida es. |
| 12 | duc me amabo. DEL. Cave ne cadas, asta. |
| 13 | CALL. O - o - ocellus meus, tuos sum alumnus, mel meum. |
| 14 | DEL. Cave modo, ne prius in via accumbas, |
| 15 | quam illi, ubi lectus est stratus, concumbimus. |
| 16 | CALL. Sine, sine cadere me. DEL. Sino, sed hoc, quod mi in manu est: |
| 17 | si cades, non cades quin cadam tecum. |
| 18 | CALL. Iacentis tollet postea nos ambos aliquis. |
| 19 | DEL. Madet homo. CALL. Tun me ais mammamadere? |
| 20 | DEL. Cedo manum, nolo equidem te adfligi. |
| 21 | CALL. Em tene. DEL. Age, i simul. CALL. Quo ego eam? DEL. An nescis? |
| 22 | CALL. Scio, in mentem venit modo: |
| 23 | nempe domum eo comissatum. |
| 24 | DEL. Immo, istuc quidem. CALL. Iam memini. |
| 25 | PHILOL. Num non vis me obviam his ire, anime mi? |
| 26 | illi ego ex omnibus optume volo. |
| 27 | iam revertar. PHILEM. Diu est iam id mihi. |
| 28 | CALL. Ecquis hic est? PHILOL. Adest. CALL. Eu, Philolaches, |
| 29 | salve, amicissime mi omnium hominum. |
| 30 | PHILOL. Di te ament. accuba, Callidamates. |
| 31 | unde agis te? CALL. Unde homo ebrius probe. |
| 32 | PHILEM. Quin amabo accubas, Delphium mea? |
| 33 | da illi quod bibat. CALL. Dormiam ego iam. |
| 34 | PHILOL. Num mirum aut novom quippiam facit? |
| 35 | DEL. Quid ego hoc faciam postea? PHILEM. Mea, sic sine eumpse. |
| 36 | age tu interim da ab Delphio cito cantharum circum. |