Plautus, Curculio, 2, Scaena III. Curculio Phaedromus Palinurus
| 1 | CURC. Date viam mihi, noti [atque] ignoti, dum ego hic officium meum |
| 2 | facio: fugite omnes, abite et de via decedite, |
| 3 | ne quem in cursu capite aut cubito aut pectore offendam aut genu. |
| 4 | ita nunc subito, propere et celere obiectumst mihi negotium, |
| 5 | nec <homo> quisquamst tam opulentus, qui mi obsistat in via, |
| 6 | nec strategus nec tyrannus quisquam, nec agoranomus, |
| 7 | nec demarchus nec comarchus, nec cum tanta gloria, |
| 8 | quin cadat, quin capite sistat in via de semita. |
| 9 | tum isti Graeci palliati, capite operto qui ambulant, |
| 10 | qui incedunt suffarcinati cum libris, cum sportulis, |
| 11 | constant, conferunt sermones inter sese drapetae, |
| 12 | obstant, obsistunt, incedunt cum suis sententiis, |
| 13 | quos semper videas bibentes esse in thermipolio, |
| 14 | ubi quid subripuere: operto capitulo calidum bibunt, |
| 15 | tristes atque ebrioli incedunt: eos ego si offendero, |
| 16 | ex unoquoque eorum exciam crepitum polentarium. |
| 17 | tum isti qui ludunt datatim servi scurrarum in via, |
| 18 | et datores et factores omnis subdam sub solum. |
| 19 | proin se domi contineant * , vitent infortunio. |
| 20 | PHAED. Recte hic monstrat, si imperare possit. nam ita nunc mos viget, |
| 21 | ita nunc servitiumst: profecto modus haberi non potest. |
| 22 | CURC. Ecquis est qui mihi commonstret Phaedromum genium meum? |
| 23 | ita res subita est, celeriter mihi [hoc] homine convento est opus. |
| 24 | PAL. Te ille quaerit. PHAED. Quid si adeamus? heus, Curculio, te volo. |
| 25 | CURC. Quis vocat? quis nominat me? PHAED. Qui te conventum cupit. |
| 26 | CURC. Haud magis <me> cupis quam ego te cupio. PHAED. O mea opportunitas, |
| 27 | Curculio exoptate, salve. CURC. Salve. PHAED. Salvom gaudeo |
| 28 | te advenire. cedo tuam mi dexteram. ubi sunt spes meae? |
| 29 | eloquere, obsecro hercle. CURC. Eloquere, te obsecro, ubi sunt meae? |
| 30 | PHAED. Quid tibist? CURC. Tenebrae oboriuntur, genua inedia succidunt. |
| 31 | PHAED. Lassitudine hercle credo. CURC. Retine, retine me, obsecro. |
| 32 | PHAED. Viden ut expalluit? datin isti sellam, ubi assidat, cito |
| 33 | et aqualem cum aqua? properatin ocius? CURC. Animo male est. |
| 34 | PAL. Vin aquam? CURC. Si frustulenta est, da, obsecro hercle, obsorbeam. |
| 35 | PAL. Vae capiti tuo. CURC. Obsecro hercle, facite ventum ut gaudeam. |
| 36 | PAL. Maxume. CURC. Quid facitis, quaeso? PAL. Ventum. CURC. Nolo equidem mihi |
| 37 | fieri ventulum. PHAED. Quid igitur vis? CURC. Esse, ut ventum gaudeam. |
| 38 | PAL. Iuppiter te dique perdant. CURC. Perii, prospicio parum, |
| 39 | gramarum habeo dentes plenos, lippiunt fauces fame, |
| 40 | ita cibi vacivitate venio lassis lactibus. |
| 41 | PHAED. Iam edes aliquid. CURC. Nolo hercle aliquid: certum quam aliquid mavolo. |
| 42 | PAL. Immo si scias, reliquiae quae sint. CURC. Scire nimis lubet |
| 43 | ubi sient, nam illis conventis sane opus est meis dentibus. |
| 44 | PHAED. Pernam, abdomen, sumen sueris, glandium - CURC. Ain tu omnia haec? |
| 45 | in carnario fortasse dicis. PHAED. Immo in lancibus, |
| 46 | quae tibi sunt parata, postquam scimus venturum. CURC. Vide |
| 47 | ne me ludas. PHAED. Ita me amabit quam ego amo, ut ego haud mentior. |
| 48 | sed quod te misi, nihilo sum certior. CURC. Nihil attuli. |
| 49 | PHAED. Perdidisti me. CURC. Invenire possum, si mi operam datis. |
| 50 | postquam tuo iussu profectus sum, perveni in Cariam, |
| 51 | video tuom sodalem, argenti rogo uti faciat copiam. |
| 52 | scires velle gratiam tuam, noluit frustrarier, |
| 53 | ut decet velle hominem amicum amico, atque opitularier: |
| 54 | respondit mihi paucis verbis, atque adeo fideliter, |
| 55 | quod tibi est item sibi esse, magnam argenti inopiam. |
| 56 | PHAED. Perdis me tuis dictis. CURC. Immo servo et servatum volo. |
| 57 | postquam mihi responsum est, abeo ab illo maestus ad forum |
| 58 | med illo frustra advenisse. forte aspicio militem. |
| 59 | aggredior hominem, saluto adveniens. 'salve' inquit mihi, |
| 60 | prendit dexteram, seducit, rogat quid veniam Cariam; |
| 61 | dico me illo advenisse animi causa. ibi me interrogat, |
| 62 | ecquem in Epidauro Lyconem tarpezitam noverim. |
| 63 | dico me novisse. 'quid? lenonem Cappadocem?' annuo |
| 64 | visitasse. 'sed quid eum vis?' 'quia de illo emi virginem |
| 65 | triginta minis, vestem, aurum; et pro is decem coaccedunt minae.' |
| 66 | 'dedisti tu argentum?' inquam. 'immo apud trapezitam situm est |
| 67 | illum quem dixi Lyconem, atque ei mandavi, qui anulo |
| 68 | meo tabellas obsignatas attulisset, ut daret |
| 69 | operam, ut mulierem a lenone cum auro et veste abduceret.' |
| 70 | postquam hoc mihi narravit, abeo ab illo. revocat me ilico, |
| 71 | vocat me ad cenam; religio fuit, denegare nolui. |
| 72 | 'quid si abeamus ac decumbamus?' inquit. consilium placet: |
| 73 | 'neque diem decet morari, neque nocti nocerier. ' |
| 74 | 'omnis res paratast'. et nos, quibus paratum est, assumus. |
| 75 | postquam cenati atque appoti, talos poscit sibi in manum, |
| 76 | provocat me in aleam, ut ego ludam: pono pallium; |
| 77 | ille suom amiculum opposivit, invocat Planesium. |
| 78 | PHAED. Meosne amores? CURC. Tace parumper. iacit volturios quattuor. |
| 79 | talos arripio, invoco almam meam nutricem Herculem, |
| 80 | iacto basilicum; propino magnum poclum: ille ebibit, |
| 81 | caput deponit, condormiscit. ego ei subduco anulum, |
| 82 | deduco pedes de lecto clam, ne miles sentiat. |
| 83 | rogant me servi quo eam: dico me ire quo saturi solent. |
| 84 | ostium ubi conspexi, exinde me ilico protinam dedi. |
| 85 | PHAED. Laudo. CURC. Laudato quando illud quod cupis effecero. * * * |
| 86 | eamus nunc intro, ut tabellas consignemus. PHAED. Num moror? |
| 87 | CURC. Atque aliquid prius obstrudamus, pernam, sumen, glandium, |
| 88 | haec sunt ventris stabilimenta, pane et assa bubula, |
| 89 | poculum grande, aula magna, ut satis consilia suppetant. |
| 90 | tu tabellas consignato, hic ministrabit, ego edam. |
| 91 | dicam quem ad modum conscribas. sequere me hac intro. PHAED. Sequor. ? |