Plautus, Curculio, 1, Scaena I. Palinurus Phaedromus
| 1 | PAL. Quo ted hoc noctis dicam proficisci foras |
| 2 | Cum istoc ornatu cumque hac pompa, Phaedrome? |
| 3 | PHAED. Quo Venus Cupidoque imperat, suadet Amor: |
| 4 | si media nox est sive est prima vespera, |
| 5 | si status condictus cum hoste intercedit dies, |
| 6 | tamen est eundum quo imperant ingratiis. |
| 7 | PAL. At tandem, tandem - PHAED. Tandem es odiosus mihi. |
| 8 | PAL. Istuc quidem nec bellum est nec memorabile: |
| 9 | tute tibi puer es, lautus luces cereum. |
| 10 | PHAED. Egon apicularum congestum opera non feram, |
| 11 | ex dulci oriundum melculo dulci meo? |
| 12 | PAL. Nam quo te dicam ego ire? PHAED. Si tu me roges, |
| 13 | dicam ut scias. PAL. Si rogitem, quid respondeas? |
| 14 | PHAED. Hoc Aesculapi fanum est. PAL. Plus iam anno scio. |
| 15 | PHAED. Huic proxumum illud ostiumst oculissimum. |
| 16 | salve, valuistin? PAL. Ostium occlusissimum, |
| 17 | caruitne febris te heri vel nudiustertius |
| 18 | et heri cenavistine? PHAED. Deridesne me? |
| 19 | PAL. Quid tu ergo, insane, rogitas valeatne ostium? |
| 20 | PHAED. Bellissimum hercle vidi et taciturnissimum, |
| 21 | numquam ullum verbum muttit: cum aperitur tacet, |
| 22 | cum illa noctu clanculum ad me exit, tacet. |
| 23 | PAL. Numquid tu quod te aut genere indignum sit tuo |
| 24 | facis aut inceptas facinus facere, Phaedrome? |
| 25 | num tu pudicae cuipiam insidias locas |
| 26 | aut quam pudicam esse oportet? PHAED. Nemini, |
| 27 | nec me ille sirit Iuppiter. PAL. Ego item volo. |
| 28 | ita tuom conferto amare semper, si sapis, |
| 29 | ne id quod ames populus si sciat, tibi sit probro. |
| 30 | semper curato ne sis intestabilis. |
| 31 | PHAED. Quid istuc est verbi? PAL. Caute ut incedas via: |
| 32 | quod amas amato testibus praesentibus. |
| 33 | PHAED. Quin leno hic habitat. PAL. Nemo hinc prohibet nec vetat, |
| 34 | quin quod palam est venale, si argentum est, emas. |
| 35 | nemo ire quemquam publica prohibet via; |
| 36 | dum ne per fundum saeptum facias semitam, |
| 37 | dum ted abstineas nupta, vidua, virgine, |
| 38 | iuventute et pueris liberis, ama quid lubet. |
| 39 | PHAED. Lenonis hae sunt aedes. PAL. Male istis evenat. |
| 40 | PHAED. Qui? PAL. Quia scelestam servitutem serviunt. |
| 41 | PHAED. Obloquere. PAL. Fiat maxume. PHAED. Etiam taces? |
| 42 | PAL. Nempe obloqui me iusseras. PHAED. At nunc veto. |
| 43 | sed ita uti occepi dicere: ei ancillula est. |
| 44 | PAL. Nempe huic lenoni qui hic habitat? PHAED. Recte tenes. |
| 45 | PAL. Minus formidabo, ne excidat. PHAED. Odiosus es. |
| 46 | eam volt meretricem facere. ea me deperit, |
| 47 | ego autem cum illa facere nolo mutuom. |
| 48 | PAL. Quid ita? PHAED. Quia proprium facio: amo pariter simul. |
| 49 | PAL. Malus clandestinus est amor, damnumst merum. |
| 50 | PHAED. Est hercle ita ut tu dicis. PAL. Iamne ea fert iugum? |
| 51 | PHAED. Tam a me pudica est quasi soror mea sit, nisi |
| 52 | si est osculando quippiam impudicior. |
| 53 | PAL. Semper tu scito, flamma fumo est proxima; |
| 54 | fumo comburi nil potest, flamma potest. |
| 55 | qui e nuce nuculeum esse volt, frangit nucem: |
| 56 | qui volt cubare, pandit saltum saviis. |
| 57 | PHAED. At illa est pudica neque dum cubitat cum viris. |
| 58 | PAL. Credam, pudor si cuiquam lenoni siet. |
| 59 | PHAED. Immo ut illam censes? ut quaeque illi occasiost, |
| 60 | subripere se ad me; ubi savium oppegit, fugit. |
| 61 | id eo fit, quia hic leno, <hic qui> aegrotus incubat |
| 62 | in Aesculapi fano, is me excruciat. PAL. Quid est? |
| 63 | PHAED. Alias me poscit pro illa triginta minas, |
| 64 | alias talentum magnum; neque quicquam queo |
| 65 | aequi bonique ab eo impetrare. PAL. Iniurius, |
| 66 | qui quod lenoni nulli est id ab eo petas. |
| 67 | PHAED. Nunc hinc parasitum in Cariam misi meum |
| 68 | petitum argentum a meo sodali mutuom. |
| 69 | quod si non affert, quo me vortam nescio. |
| 70 | PAL. Si deos salutas, dextrovorsum censeo. |
| 71 | PHAED. Nunc ara Veneris haec est ante horunc fores; |
| 72 | me inferre Veneri vovi ieientaculum. |
| 73 | PAL. Quid? tu te pones Veneri ieientaculo? |
| 74 | PHAED. Me, te atque hosce omnis. PAL. Tum tu Venerem vomere vis. |
| 75 | PHAED. Cedo, puere, sinum. PAL. Quid facturus? PHAED. Iam scies. |
| 76 | anus hic solet cubitare custos ianitrix, |
| 77 | nomen Leaenae est, multibiba atque merobiba. |
| 78 | PAL. Quasi tu lagoenam dicas, ubi vinum Chium |
| 79 | solet esse. PHAED. Quid opust verbis? vinosissima est; |
| 80 | eaque extemplo ubi <ego> vino has conspersi fores, |
| 81 | de odore adesse me scit, aperit ilico. |
| 82 | PAL. Eine hic cum vino sinus fertur? PHAED. Nisi nevis. |
| 83 | PAL. Nolo hercle, nam istunc qui fert afflictum velim; |
| 84 | ego nobis afferri censui. PHAED. Quin tu taces? |
| 85 | si quid super illi fuerit, id nobis sat est. |
| 86 | PAL. Quisnam istic fluviust, quem non recipiat mare? |
| 87 | PHAED. Sequere hac, Palinure, me ad fores, fi mi obsequens. |
| 88 | PAL. Ita faciam. PHAED. Agite bibite, festivae fores; |
| 89 | potate, fite mihi volentes propitiae. |
| 90 | PAL. Voltisne olivas [aut] pulpamentum [aut] capparim? |
| 91 | PHAED. Exsuscitate vostram huc custodem mihi. |
| 92 | PAL. Profundis vinum: quae te res agitant? PHAED. Sine. |
| 93 | viden ut aperiuntur aedes festivissumae? |
| 94 | num muttit cardo? est lepidus. PAL. Quin das savium? |
| 95 | PHAED. Tace, occultemus lumen et vocem. PAL. Licet. |