Plautus, Casina, 3, Scaena II. Alcesimus Cleostrata
| 1 | AL. Miror huc iam non arcessi in proxumum uxorem meam, |
| 2 | Quae iam dudum, si arcessatur, ornata exspectat domi. |
| 3 | Sed eccam: opino arcessit. salve Cleostrata. CLE. Et tu, Alcesime. |
| 4 | Ubi tua uxor? AL. Intus illa te, si se arcessas, manet: |
| 5 | Nam tuos vir me oravit, ut eam isto ad te adiutum mitterem. |
| 6 | Vin vocem? CLE. Sine eam: te nolo, si occupatast. AL. Otiumst. |
| 7 | CLE. Nil moror: molesta ei esse nolo: post convenero. |
| 8 | AL. Non ornatis isti apud vos nuptias? CLE. Orno et paro. |
| 9 | AL. Non ergo opus est adiutrice? CLE. Satis domist: ubi nuptiae |
| 10 | Fuerint, tum istam convenibo. nunc vale atque istanc iube. |
| 11 | AL. Quid ego nunc faciam? flagitium maxumum feci miser |
| 12 | Propter operam illius irqui improbi edentuli, |
| 13 | Qui hoc mihi contraxit. operam uxoris polliceor foras |
| 14 | Quasi catillatum. flagitium hominis, qui dixit mihi |
| 15 | Suam uxorem hanc arcessituram esse: ea se eam negat morarier. |
| 16 | Atque edepol mirum ni subolet iam hoc huic vicinae meae. |
| 17 | Verum autem altrovorsum quom eam mecum rationem puto, |
| 18 | Siquid eius esset, esset mecum postulatio. |
| 19 | [CLE.] Ibo intro, ut subducam navim rusum in pulvinaria. |
| 20 | CLE. Iam hic est lepide ludificatus. miseri ut festinant senes. |
| 21 | Nunc ego illum nili, decrepitum, meum virum veniat velim |
| 22 | Ut eum ludificem vicissim, postquam hunc delusi alterum. |
| 23 | Nam ego aliquid contrahere cupio litigi inter eos duos. |
| 24 | Sed eccum incedit: at quom aspicias tristem, frugi censeas. |