Plautus, Casina, 2, Scaena VIII. Olympio Lysidamus Chalinus
| 1 | OL. Sine modo rus veniat: ego remittam ad te virum |
| 2 | Cum furca in urbem tamquam carbonarium. |
| 3 | LY. Ita fieri oportet. OL. Factum et curatum dabo. |
| 4 | LY. Volui Chalinum, si domi esset, mittere |
| 5 | Tecum obsonatum, ut etiam in maerore insuper |
| 6 | Inimico nostro miseriam hanc adiungerem. |
| 7 | CHA. Recessim cedam ad parietem: imitabor nepam: |
| 8 | Captandust horum clanculum sermo mihi. |
| 9 | Nam illorum me alter cruciat, alter macerat. |
| 10 | At candidatus cedit hic mastigia, |
| 11 | Stimulorum loculi. protollo mortem mihi: |
| 12 | Certumst, hunc Acheruntem praemittam prius. |
| 13 | OL. Ut tibi ego inventus sum obsequens. quod maxume |
| 14 | Cupiebas, eius copiam feci tibi: |
| 15 | Erit hodie tecum quod amas clam uxorem. LY. Tace: |
| 16 | Ita me di bene ament, ut ego vix reprimo labra, |
| 17 | Ob istanc rem quin te deosculer, voluptas mea. |
| 18 | CHA. Quid, deosculere? quae res? quae voluptas tua? |
| 19 | Ecfodere hercle hic volt, credo, vesicam vilico. |
| 20 | OL. Ecquid amas nunc me? LY. Immo edepol me quam te minus. |
| 21 | Licetne amplecti te? CHA. Quid, amplecti? OL. Licet. |
| 22 | LY. Ut, quia te tango, mel mihi videor lingere. |
| 23 | OL. Ultro te, amator, apage te a dorso meo. |
| 24 | CHA. Illuc est, illuc, quod hic hunc fecit vilicum. |
| 25 | Et idem me pridem, quom ei advorsum veneram, |
| 26 | Facere atriensem voluerat sub ianua. |
| 27 | OL. Ut tibi morigerus hodie, ut voluptati fui. |
| 28 | LY. Ut tibi, dum vivam, bene velim plus quam mihi. |
| 29 | CHA. Hodie hercle, opinor, hi conturbabunt pedes: |
| 30 | Solet hic barbatos sane sectari senex. |
| 31 | LY. Ut ego hodie Casillam deosculabor, ut mihi |
| 32 | Bona multa faciam clam meam uxorem. CHA. Attatae. |
| 33 | Nunc pol ego demum in rectam redii semitam: |
| 34 | Hic ipsus Casinam deperit. habeo viros. |
| 35 | LY. Iam hercle amplexari, iam osculari gestio. |
| 36 | OL. Sine prius deduci. quid, malum, properas? LY. Amo. |
| 37 | OL. At non, opinor, fieri hoc posse hodie. LY. Potest, |
| 38 | Siquidem cras eenses te posse emitti manu. |
| 39 | CHA. Enim vero huc aures magis sunt adhibendae mihi: |
| 40 | Iam ego uno in saltu lepide apros capiam duos. |
| 41 | LY. Apud hunc sodalem meum atque vicinum mihi |
| 42 | Locus est paratus: ei ego amorem omnem meum |
| 43 | Concredui, is mihi se locum dixit dare. |
| 44 | OL. Quid eius uxor? ubi erit? LY. Lepide repperi: |
| 45 | Mea uxor vocabit huc eam ad se in nuptias, |
| 46 | Ut hic sit secum, se adiuvet, secum cubet. |
| 47 | Ego iussi, et dixit se facturam uxor mea. |
| 48 | Illa hic cubabit, [si] vir aberit faxo domo. |
| 49 | Tu rus uxorem duces: id rus hic erit, |
| 50 | Tantisper dum ego cum Casina faciam nuptias: |
| 51 | Hinc tu ante lucem rus cras duces postea. |
| 52 | Satin astu? OL. Docte. CHA. Age modo, fabricamini: |
| 53 | Malo hercle vostro tam vorsuti vivitis. |
| 54 | LY. Scin quid nunc facias? OL. Loquere. LY. Tene marsuppium. |
| 55 | Abi atque obsona, propera: sed lepide volo, |
| 56 | Molliculas escas, ut ipsa molliculast. OL. Licet. |
| 57 | LY. Emito sepiolas, lopadas, loligunculas, |
| 58 | Hordeias, - CHA. Immo triticeias, si sapis. |
| 59 | LY. Soleas. CHA. Qui, quaeso, potius quam sculponeas, |
| 60 | Quibus battuatur tibi os, senex nequissume? |
| 61 | OL. Vin lingulacas? LY. Quid opust, quando uxor domist? |
| 62 | Ea lingulacast nobis: nam numquam tacet. |
| 63 | OL. In re praesenti ex copia piscaria |
| 64 | Consulere quid emam potero. LY. Aequom oras: abi. |
| 65 | Argento parci nolo: obsonato ampliter. |
| 66 | Nam mihi vicino hoc etiam conventost opus, |
| 67 | Ut quod mandavi curet. OL. Iamne abeo? LY. Volo. |
| 68 | CHA. Tribus non conduci possum libertatibus, |
| 69 | Quin ego illis hodie comparem magnum malum |
| 70 | Quinque hanc omnem rem meae erae iam faciam palam. |
| 71 | Manufesto teneo in noxia inimicos meos. |
| 72 | Sed si nunc facere volt era officium suom, |
| 73 | Nostra omnis lis est: pulcre praevortar viros. |
| 74 | Nostro omine it dies: iam victi vicimus. |
| 75 | Ibo intro, ut id quod alius condivit coquos |
| 76 | Ego nuna vicissim ut alio pacto condiam: |
| 77 | Quod id quod paratumst, ut paratum ne siet, |
| 78 | Sitque ei paratum quod paratum non erat. |