Plautus, Casina, 2, Scaena III. Lysidamus Cleostrata
| 1 | LY. Omnibus rebus ego amorem credo et nitoribus nitidis antevenire, |
| 2 | Nec potis quicquam commemorari, quod plus salis plusque leporis hodie |
| 3 | Habeat. cocos equidem nimis demiror, qui lituntur condimentis, |
| 4 | Eos eo condimento uno non utier, omnibus quod praestat. |
| 5 | Nam ubi amor condimentum inerit, quoivis placituram credo, |
| 6 | Neque salsum neque suave esse potest quicquam, ubi amor non admiscetur: |
| 7 | Fel quod amarumst, id mel faciet: hominem ex tristi lepidum et lenem. |
| 8 | Hanc ego de me coniecturam domi facio magis quam ex auditis: |
| 9 | Qui quam amo Casinam magis, inicio munditiis Munditiam antideo. |
| 10 | Myropolas omnis sollicito: ubiquomquest lepidum unguentum, unguor, |
| 11 | Ut illi placeam: et placeo, ut videor. sed uxor me excruciat, quia vivit. |
| 12 | Tristem astare aspicio: blande haec mihi mala res appellandast. |
| 13 | Uxor mea meaque amoenitas, quid tu agis? CLE. Manum abi atque abstine. |
| 14 | LY. Heia, mea Iuno, non decet esse te tam tristem tuo Iovi. |
| 15 | Quo nunc abis? CLE. Mitte me. LY. Mane. CLE. Non maneo. LY. At pol ego te sequar. |
| 16 | CLE. obsecro, sanun es? LY. Sanus. quam ted amo. |
| 17 | CLE. Nolo ames. LY. Non potes impetrare. CLE. Enecas. |
| 18 | LY. Vera dicas velim. CLE. Credo ego istuc tibi. |
| 19 | LY. Respice, o mi lepos. CLE Nempe ita ut tu mihis. |
| 20 | Unde hic, amabo, unguenta olent? LY. Oh perii. |
| 21 | Manufesto miser teneor. cesso caput pallio detergere? |
| 22 | Ut te bonus Mercurius perdat, myropola, quia haec mihi dedisti. |
| 23 | CLE. Eho tu, nili, cana culex: vix teneor, quin quae decent te dicam. |
| 24 | Senecta aetate unguentatus per vias, ignave, incedis? |
| 25 | LY. Pol ego amico dedi quoidam operam, dum emit unguenta. CLE. Ut cito commentust. |
| 26 | Ecquid te pudet? LY. Omnia quae tu vis. CLE. Ubi in lustra iacuisti? |
| 27 | LY. Egon in lustra? CLE. Scio plus quam tu me arbitrare. LY. Quid id est? quid [tu] seis? |
| 28 | CLE. Te sene omnium senem neminem esse ignaviorem. |
| 29 | Unde is, nili? ubi fuisti? ubi lustratus? ubi bibisti? |
| 30 | Mades mecastor: vide palliolum ut rugat. LY. Di me et te infelicent, |
| 31 | Si ego in os meum hodie vini guttam indidi. |
| 32 | CLE. Immo age ut lubet bibe, es, disperde rem. |
| 33 | LY. Ohe, iam satis, uxor, Comprime te? nimium tinnis. |
| 34 | Relinque aliquantum orationis, cras quod mecum litiges. |
| 35 | Sed quid ais? iam domuisti animum, potius ut, quod vir velit |
| 36 | Fieri, id facias, [potius] quam advorsere contra? CLE. Qua de re? LY. Rogas? |
| 37 | Super ancilla Casina: ut detur nuptum nostro vilico, |
| 38 | Servo frugi? atque ubi illi bene sit ligno, aqua calida? cibo, |
| 39 | Vestimentis? ubique educat pueros quos pariat |
| 40 | Potius quam illi servo nequam des armigero [nisi] atque improbo, |
| 41 | Quoi homini hodie peculi nummus non est plumbeus. |
| 42 | CLE. Mirum ecastor te senecta aetate officium tuom |
| 43 | Non meminisse. LY. Quid iam? CLE. Quia, si facias recte aut commode, |
| 44 | Me sinas curare ancillas: quae meast curatio. |
| 45 | LY. Cui, malum, homini scutigerulo dare lubet? CLE. Quia enim filio |
| 46 | Nos oportet opitulari unico. LY. At quamquam unicust, |
| 47 | Nilo magis ille unicust mihi filius quam ego illi pater: |
| 48 | Illum mi aequiust quam me illi quae volo concedere. |
| 49 | CLE. Tu ecastor tibi, homo, malam rem quaeris: subolet, selltio. |
| 50 | LY. Egone? CLE. Tu: nam quid friguttis? quid istuc tam cupide cupis? |
| 51 | LY. Ut enim frugi servo detur potius quam servo improbo. |
| 52 | CLE. Quid si ego impetro atque exoro a vilico, causa mea |
| 53 | Ut eam illi permittat? LY. Quid si ego autem ab armigero impetro, |
| 54 | Ut eam illi permittat? atque hoc credo impetrassere. |
| 55 | CLE. Convenit. vin tuis Chalinum huc evocem verbis foras? |
| 56 | Tu eum orato, ego autem orabo vilicum. LY. Sane volo. |
| 57 | CLE. Iam hic erit: nunc experiemur, nostrum uter sit blandior. |
| 58 | LY. Hercules dique istam perdant, quod nunc liceat dicere. |
| 59 | Ego discrucior miser amore, illa autem quasi ob industriam |
| 60 | Mi advorsatur. subolet hoc iam uxori, quod ego machinor: |
| 61 | Propter eam rem magis armigero dat operam de industria. |