Plautus, Casina, 1, Scaena I. Olympio Chalinus
| 1 | OL. Non mihi licere meam rem me solum ut volo |
| 2 | Loqui atque cogitare sine ted arbitro? |
| 3 | Quid tu, malum, me sequere? CHA. Quia certumst mihi, |
| 4 | Quasi umbra, quoquo tu ibis te semper sequi. |
| 5 | Quin edepol etiam, si in crucem vis pergere, |
| 6 | Sequi decretumst: dehinc conicito ceterum: |
| 7 | Possisne necne clam me sutelis tuis |
| 8 | Praeripere Casinam uxorem, proinde ut postulas. |
| 9 | OL. Quid tibi negotist mecum? CHA. Quid ais, impudens? |
| 10 | Quid in urbe reptas, vilice haud magni preti? |
| 11 | OL. Lubet. CHA. Quin ruri es in praefectura tua? |
| 12 | Quin potius quod legatumst tibi negotium |
| 13 | Id curas atque urbanis rebus te apstines? |
| 14 | Huc mihi venisti sponsam praereptum meam. |
| 15 | Abi rus, abi dierectus tuam in provinciam. |
| 16 | OL. Chaline, non sum oblitus officium meum: |
| 17 | Praefeci ruri recte qui curet tamen. |
| 18 | Ego huc quod veni in urbem si impetravero, |
| 19 | Uxorem ut istam ducam quam tu deperis, |
| 20 | Bellam et tenellam Casinam, conservam tuam: |
| 21 | Quando ego eam mecum rus uxorem abduxero, |
| 22 | Rure incubabo usque in praefectura mea. |
| 23 | CHA. Tun illam ducas? hercle me suspendio |
| 24 | Quam tu eius potior fias satiust mortuom. |
| 25 | OL. Mea praedast illa: proin tu te in laqueum induas. |
| 26 | CHA. Ex sterculino effosse, tua illaec praeda sit? |
| 27 | OL. Scies hoc ita esse. vae tibi: quot te modis, |
| 28 | Si vivo, habebo in nuptiis miserum meis. |
| 29 | CHA. Quid tu mihi facies? OL. Egone quid faciam tibi? |
| 30 | Primum omnium huic lucebis novae nuptae facem: |
| 31 | (Postilla ut semper improbus nilique sis.) |
| 32 | Postid locorum quando ad villam veneris, |
| 33 | Dabitur tibi amphora una et una semita, |
| 34 | Fons unus, unum ahenum et octo dolia: |
| 35 | Quae nisi erunt semper plena, ego te implebo flagris |
| 36 | Ita te aggerunda curvom aqua faciam probe, |
| 37 | Ut postilena possit ex te fieri. |
| 38 | Post autem ruri nisi tu tacervom ederis |
| 39 | Aut quasi lumbricus terram, quod te postules |
| 40 | Gustare quicquam: numquam edepol ieiunium |
| 41 | Ieiunumst aeque atque ego te ruri reddibo. |
| 42 | Postid, quom lassus fueris et famelicus, |
| 43 | Noctu ut condigne te cubes curabitur. |
| 44 | CHA. Quid facies? OL. Concludere in fenestramfirmiter, |
| 45 | Unde auscultare possis, quom ego illam ausculer. |
| 46 | Quom mihi illa dicet: mi animule, mi Olympio, |
| 47 | Mea vita, mea mellilla, mea festivitas: |
| 48 | Sine tuos ocellos deosculer, voluptas mea, |
| 49 | Sine, amabo, ted amari, meus festus dies, |
| 50 | Meus pullus passer, mea columba, mi lepus: |
| 51 | Quom mi haec dicentur dicta, tum tu, furcifer, |
| 52 | Quasi mus in medio pariete vorsabere. |
| 53 | [CHA.] Nunc ne tu te mihi respondere postules. |
| 54 | Abeo intro: taedet tui sermonis. CHA. Te sequor: |
| 55 | Hic quidem pol certo nil ages sine med arbitro. |