Plautus, Aulularia, 4, Scaena VIII. Strobilus
| 1 | STROB. Picis divitiis, qui aureos montes colunt, |
| 2 | ego solus supero. nam istos reges ceteros |
| 3 | memorare nolo, hominum mendicabula: |
| 4 | ego sum ille rex Philippus. o lepidum diem. |
| 5 | nam ut dudum hinc abii, multo illo adveni prior |
| 6 | multoque prius me conlocavi in arborem |
| 7 | indeque spectabam aurum ubi abstrudebat senex. |
| 8 | ubi ille abiit, ego me deorsum duco de arbore, |
| 9 | exfodio aulam auri plenam. inde ex eo loco |
| 10 | video recipere se senem; ille me non videt, |
| 11 | nam ego declinavi paululum me extra viam. |
| 12 | attat, eccum ipsum. ibo ut hoc condam domum. - |