Plautus, Aulularia, 3, Scaena VI. Euclio Megadorus
| 1 | EUCL. Nimium lubenter edi sermonem tuom. |
| 2 | MEG. An audivisti? EUCL. Usque a principio omnia. |
| 3 | MEG. Tamen meo quidem animo aliquanto facias rectius, |
| 4 | si nitidior sis filiai nuptiis. |
| 5 | EUCL. Pro re nitorem et gloriam pro copia |
| 6 | qui habent, meminerunt sese unde oriundi sient. |
| 7 | neque pol, Megadore, mihi neque quoiquam pauperi |
| 8 | opinione melius res structa est domi. |
| 9 | MEG. Immo est <quod satis est>, et di faciant ut siet |
| 10 | plus plusque <et> istuc sospitent quod nunc habes. |
| 11 | EUCL. Illud mihi verbum non placet 'quod nunc habes.' |
| 12 | tam hoc scit me habere quam egomet. anus fecit palam. |
| 13 | MEG. Quid tu te solus e senatu sevocas? |
| 14 | EUCL. Pol ego ut te accusem merito meditabar. MEG. Quid est? |
| 15 | EUCL. Quid sit me rogitas? qui mihi omnis angulos |
| 16 | furum implevisti in aedibus misero mihi, |
| 17 | qui mi intro misti in aedis quingentos coquos, |
| 18 | cum senis manibus, genere Geryonaceo; |
| 19 | quos si Argus servet, qui oculeus totus fuit, |
| 20 | quem quondam Ioni Iuno custodem addidit, |
| 21 | is numquam servet. praeterea tibicinam, |
| 22 | quae mi interbibere sola, si vino scatat, |
| 23 | Corinthiensem fontem Pirenam potest. |
| 24 | tum obsonium autem - MEG. Pol vel legioni sat est. |
| 25 | etiam agnum misi. EUCL. Quo quidem agno sat scio |
| 26 | magis curionem nusquam esse ullam belvam. |
| 27 | MEG. Volo ego ex te scire qui sit agnus curio. |
| 28 | EUCL. Quia ossa ac pellis totust, ita cura macet. |
| 29 | quin exta inspicere in sole ei vivo licet: |
| 30 | ita is pellucet quasi lanterna Punica. |
| 31 | MEG. Caedundum conduxi ego illum. EUCL. Tum tu idem optumumst |
| 32 | loces efferendum; nam iam, credo, mortuost. |
| 33 | MEG. Potare ego hodie, Euclio, tecum volo. |
| 34 | EUCL. Non potem ego quidem hercle. MEG. At ego iussero |
| 35 | cadum unum vini veteris a me adferrier. |
| 36 | EUCL. Nolo hercle, nam mihi bibere decretum est aquam. |
| 37 | MEG. Ego te hodie reddam madidum, si vivo, probe, |
| 38 | tibi cui decretum est bibere aquam. EUCL. Scio quam rem agat: |
| 39 | ut me deponat vino, eam adfectat viam, |
| 40 | post hoc quod habeo ut commutet coloniam. |
| 41 | ego id cavebo, nam alicubi abstrudam foris. |
| 42 | ego faxo et operam et vinum perdiderit simul. |
| 43 | MEG. Ego, nisi quid me vis, eo lavatum, ut sacruficem. - |
| 44 | EUCL. Edepol, ne tu, aula, multos inimicos habes |
| 45 | atque istuc aurum quod tibi concreditum est. |
| 46 | nunc hoc mihi factu est optumum, ut ted auferam, |
| 47 | aula, in Fidei fanum: ibi abstrudam probe. |
| 48 | Fides, novisti me et ego te: cave sis tibi, |
| 49 | ne in me mutassis nomen, si hoc concreduo. |
| 50 | ibo ad te fretus tua, Fides, fiducia. - |