Plautus, Aulularia, 1, Scaena II. Euclio Staphila
| 1 | EUCL. Nunc defaecato demum animo egredior domo, |
| 2 | postquam perspexi salva esse intus omnia. |
| 3 | redi nunciam intro atque intus serva. STAPH. Quippini? |
| 4 | ego intus servem? an ne quis aedes auferat? |
| 5 | nam hic apud nos nihil est aliud quaesti furibus, |
| 6 | ita inaniis sunt oppletae atque araneis. |
| 7 | EUCL. Mirum quin tua me causa faciat Iuppiter |
| 8 | Philippum regem aut Dareum, trivenefica. |
| 9 | araneas mihi ego illas servari volo. |
| 10 | pauper sum; fateor, patior; quod di dant fero. |
| 11 | abi intro, occlude ianuam. iam ego hic ero. |
| 12 | cave quemquam alienum in aedis intro miseris. |
| 13 | quod quispiam ignem quaerat, extingui volo, |
| 14 | ne causae quid sit quod te quisquam quaeritet. |
| 15 | nam si ignis vivet, tu extinguere extempulo. |
| 16 | tum aquam aufugisse dicito, si quis petet. |
| 17 | cultrum, securim, pistillum, mortarium, |
| 18 | quae utenda vasa semper vicini rogant, |
| 19 | fures venisse atque abstulisse dicito. |
| 20 | profecto in aedis meas me absente neminem |
| 21 | volo intro mitti. atque etiam hoc praedico tibi, |
| 22 | si Bona Fortuna veniat, ne intro miseris. |
| 23 | STAPH. Pol ea ipsa credo ne intro mittatur cavet, |
| 24 | nam ad aedis nostras numquam adit, quamquam prope est. |
| 25 | EUCL. Tace atque abi intro. STAPH. Taceo atque abeo. - EUCL. Occlude sis |
| 26 | fores ambobus pessulis. iam ego hic ero. |
| 27 | discrucior animi, quia ab domo abeundum est mihi. |
| 28 | nimis hercle invitus abeo. sed quid agam scio. |
| 29 | nam noster nostrae qui est magister curiae |
| 30 | dividere argenti dixit nummos in viros; |
| 31 | id si relinquo ac non peto, omnes ilico |
| 32 | me suspicentur, credo, habere aurum domi. |
| 33 | nam non est veri simile, hominem pauperem |
| 34 | pauxillum parvi facere quin nummum petat. |
| 35 | nam nunc cum celo sedulo omnis, ne sciant, |
| 36 | omnes videntur scire et me benignius |
| 37 | omnes salutant quam salutabant prius; |
| 38 | adeunt, consistunt, copulantur dexteras, |
| 39 | rogitant me ut valeam, quid agam, quid rerum geram. |
| 40 | nunc quo profectus sum ibo; postidea domum |
| 41 | me rursum quantum potero tantum recipiam. |