Plautus, Asinaria, 4, Scaena I. Diabolus Parasitus
| 1 | DIAB. Agedum istum ostende quem conscripsti syngraphum |
| 2 | inter me et amicam et lenam. leges pellege. |
| 3 | nam tu poeta es prorsus ad eam rem unicus. |
| 4 | PAR. Horrescet faxo lena, leges cum audiet. |
| 5 | DIAB. Age quaeso mi hercle translege. PAR. Audin? DIAB. Audio. |
| 6 | PAR. 'Diabolus Glauci filius Clearetae |
| 7 | lenae dedit dono argenti viginti minas, |
| 8 | Philaenium ut secum esset noctes et dies |
| 9 | hunc annum totum.' DIAB. Neque cum quiquam alio quidem. |
| 10 | PAR. Addone? DIAB. Adde, et scribas vide plane et probe. |
| 11 | PAR. 'Alienum hominem intro mittat neminem. |
| 12 | quod illa aut amicum aut patronum nominet, |
| 13 | aut quod illa amicae *** amatorem praedicet, |
| 14 | fores occlusae omnibus sint nisi tibi. |
| 15 | in foribus scribat occupatam esse se. |
| 16 | aut quod illa dicat peregre allatam epistulam, |
| 17 | ne epistula quidem ulla sit in aedibus |
| 18 | nec cerata adeo tabula; et si qua inutilis |
| 19 | pictura sit, eam vendat: ni in quadriduo |
| 20 | abalienarit, quo abs te argentum acceperit, |
| 21 | tuos arbitratus sit, comburas, si velis, |
| 22 | ne illi sit cera, ubi facere possit litteras. |
| 23 | vocet convivam neminem illa, tu voces; |
| 24 | ad eorum ne quem oculos adiciat suos. |
| 25 | si quem alium aspexit, caeca continuo siet. |
| 26 | tecum una potet, aeque pocla potitet: |
| 27 | abs ted accipiat, tibi propinet, tu bibas, |
| 28 | ne illa minus aut plus quam tu sapiat.' DIAB. Satis placet. |
| 29 | PAR. 'Suspiciones omnes ab se segreget. |
| 30 | neque illaec ulli pede pedem homini premat, |
| 31 | cum surgat, neque <cum> in lectum inscendat proximum, |
| 32 | neque cum descendat inde, det cuiquam manum: |
| 33 | spectandum ne cui anulum det neque roget. |
| 34 | talos ne cuiquam homini admoveat nisi tibi. |
| 35 | cum iaciat, 'te' ne dicat: nomen nominet. |
| 36 | deam invocet sibi quam libebit propitiam, |
| 37 | deum nullum; si magis religiosa fuerit, |
| 38 | tibi dicat: tu pro illa ores ut sit propitius. |
| 39 | neque illa ulli homini nutet, nictet, annuat. |
| 40 | post, si lucerna exstincta sit, ne quid sui |
| 41 | membri commoveat quicquam in tenebris.' DIAB. Optumest. |
| 42 | ita scilicet facturam. verum in cubiculo - |
| 43 | deme istuc - equidem illam moveri gestio. |
| 44 | nolo illam habere causam et votitam dicere. |
| 45 | PAR. Scio, captiones metuis. DIAB. Verum. PAR. Ergo ut iubes |
| 46 | tollam. DIAB. Quid ni? PAR. Audi relicua. DIAB. Loquere, audio. |
| 47 | PAR. 'Neque ullum verbum faciat perplexabile, |
| 48 | neque ulla lingua sciat loqui nisi Attica. |
| 49 | forte si tussire occepsit, ne sic tussiat, |
| 50 | ut cuiquam linguam in tussiendo proserat. |
| 51 | quod illa autem simulet, quasi gravedo profluat, |
| 52 | hoc ne sic faciat: tu labellum abstergeas |
| 53 | potius quam cuiquam savium faciat palam. |
| 54 | nec mater lena ad vinum accedat interim, |
| 55 | nec ulli verbo male dicat. si dixerit, |
| 56 | haec multa ei esto, vino viginti dies |
| 57 | ut careat.' DIAB. Pulchre scripsti. scitum syngraphum. |
| 58 | PAR. 'Tum si coronas, serta, unguenta iusserit |
| 59 | ancillam ferre Veneri aut Cupidini, |
| 60 | tuos servos servet, Venerine eas det an viro. |
| 61 | si forte pure velle habere dixerit, |
| 62 | tot noctes reddat spurcas quot pure habuerit.' |
| 63 | haec sunt non nugae, non enim mortualia. |
| 64 | DIAB. Placent profecto leges. sequere intro. - PAR. Sequor. - |