Plautus, Asinaria, 3, Scaena I. Cleareta Philaenium
| 1 | CLEAR. Nequeon ego ted interdictis facere mansuetem meis? |
| 2 | an ita tu es animata, ut qui matris expers imperio sies? |
| 3 | PHIL. Ubi piem Pietatem, si istoc more moratam tibi |
| 4 | postulem placere, mater, mihi quo pacto praecipis? |
| 5 | [CLEAR. An decorum est adversari meis te praeceptis? PHIL. Quid est?] |
| 6 | CLEAR. Hocine est pietatem colere, matris imperium minuere? |
| 7 | PHIL. Neque quae recte faciunt culpo neque quae delinquont amo. |
| 8 | CLEAR. Satis dicacula es amatrix. PHIL. Mater, is quaestus mihi est: |
| 9 | lingua poscit, corpus quaerit; animus orat, res monet. |
| 10 | CLEAR. Ego te volui castigare, tu mi accusatrix ades. |
| 11 | PHIL. Neque edepol te accuso neque id me facere fas existimo. |
| 12 | verum ego meas queror fortunas, cum illo quem amo prohibeor. |
| 13 | CLEAR. Ecqua pars orationis de die dabitur mihi? |
| 14 | PHIL. Et meam partem loquendi et tuam trado tibi; |
| 15 | ad loquendum atque ad tacendum tute habeas portisculum. |
| 16 | quin pol si reposivi remum, sola ego in casteria |
| 17 | ubi quiesco, omnis familiae causa consistit tibi. |
| 18 | CLEAR. Quid ais tu, quam ego unam vidi mulierem audacissimam? |
| 19 | quotiens te votui Argyrippum filium Demaeneti |
| 20 | compellare aut contrectare, conloquive aut contui? |
| 21 | quid dedit? quid ad nos iussit deportari? an tu tibi |
| 22 | verba blanda esse aurum rere, dicta docta pro datis? |
| 23 | ultro amas, ultro expetessis, ultro ad te accersi iubes. |
| 24 | illos qui dant, eos derides; qui deludunt, deperis. |
| 25 | an te id exspectare oportet, si quis promittat tibi |
| 26 | te facturum divitem, si moriatur mater sua? |
| 27 | ecastor nobis periclum magnum et familiae portenditur, |
| 28 | dum eius exspectamus mortem, ne nos moriamur fame. |
| 29 | nunc adeo nisi mi huc argenti adfert viginti minas, |
| 30 | ne ille ecastor hinc trudetur largus lacrumarum foras. |
| 31 | hic dies summust quo est apud me inopiae excusatio. |
| 32 | PHIL. Patiar, si cibo carere me iubes, mater mea. |
| 33 | CLEAR. Non voto ted amare qui dant quoia amentur gratia. |
| 34 | PHIL. Quid si hic animus occupatust, mater, quid faciam? mone. CLEAR. Em, |
| 35 | meum caput contemples, si quidem ex re consultas tua. |
| 36 | PHIL. Etiam opilio qui pascit, |
| 37 | mater, alienas ovis, |
| 38 | aliquam habet peculiarem, qui spem soletur suam. |
| 39 | sine me amare unum Argyrippum animi causa, quem volo. |
| 40 | CLEAR. Intro abi, nam te quidem edepol nihil est impudentius. |
| 41 | PHIL. Audientem dicto, mater, produxisti filiam. |