Plautus, Asinaria, 2, Scaena IV. Leonida Libanus Mercator
| 1 | LEON. Quid hoc sit negoti, neminem meum dictum magni facere? |
| 2 | Libanum in tonstrinam ut iusseram venire, is nullus venit. |
| 3 | ne ille edepol tergo et cruribus consuluit haud decore. |
| 4 | MERC. Nimis imperiosust. LIB. Vae mihi. LEON. Hodie salvere iussi |
| 5 | Libanum libertum? iam manu emissus? LIB. Obsecro te. |
| 6 | LEON. Ne tu hercle cum magno malo mihi obviam occessisti. |
| 7 | cur non venisti, ut iusseram, in tonstrinam? LIB. Hic me moratust. |
| 8 | LEON. Siquidem hercle nunc summum Iovem te dicas detinuisse |
| 9 | atque is precator adsiet, malam rem effugies numquam. |
| 10 | tu, verbero, imperium meum contempsisti? LIB. Perii, hospes. |
| 11 | MERC. Quaeso hercle noli, Saurea, mea causa hunc verberare. |
| 12 | LEON. Utinam nunc stimulus in manu mihi sit. MERC. Quiesce quaeso. |
| 13 | LEON. Qui latera conteram tua, quae occalluere plagis. |
| 14 | abscede ac sine me hunc perdere, qui semper me ira incendit, |
| 15 | cui numquam unam rem me licet semel praecipere furi, |
| 16 | quin centiens eadem imperem atque ogganniam, itaque iam hercle |
| 17 | clamore ac stomacho non queo labori suppeditare. |
| 18 | iussin, sceleste, ab ianua hoc stercus hinc auferri? |
| 19 | iussin columnis deici operas araneorum? |
| 20 | iussin in splendorem dari bullas has foribus nostris? |
| 21 | nihil est: tamquam si claudus sim, cum fustist ambulandum. |
| 22 | quia triduom hoc unum modo foro operam adsiduam dedo, |
| 23 | dum reperiam qui quaeritet argentum in faenus, hic vos |
| 24 | dormitis interea domi, atque erus in hara, haud aedibus, habitat. |
| 25 | em ergo hoc tibi. LIB. Hospes, te obsecro, defende. MERC. Saurea, oro, |
| 26 | mea causa ut mittas. LEON. Eho, ecquis pro vectura olivi |
| 27 | rem solvit? LIB. Solvit. LEON. Cui datumst? LIB. Sticho vicario ipsi |
| 28 | tuo. LEON. Vah, delenire apparas, scio mihi vicarium esse, |
| 29 | neque eo esse servom in aedibus eri qui sit pluris quam illest. |
| 30 | sed vina quae heri vendidi vinario Exaerambo, |
| 31 | iam pro eis satis fecit Sticho? LIB. Fecisse satis opinor, |
| 32 | nam vidi huc ipsum adducere trapezitam Exaerambum. |
| 33 | LEON. Sic dedero. prius quae credidi vix anno post exegi; |
| 34 | nunc satagit: adducit domum etiam ultro et scribit nummos. |
| 35 | Dromo mercedem rettulit? LIB. Dimidio minus opinor. |
| 36 | LEON. Quid relicuom? LIB. Aibat reddere quom extemplo redditum esset; |
| 37 | nam retineri, ut quod sit sibi operis locatum efficeret. |
| 38 | LEON. Scyphos quos utendos dedi Philodamo, rettulitne? |
| 39 | LIB. Non etiam. LEON. Hem non? si velis da *** , commoda homini amico. |
| 40 | MERC. Perii hercle, iam hic me abegerit suo odio. LIB. Heus iam satis tu. |
| 41 | audin quae loquitur? LEON. Audio et quiesco. MERC. Tandem, opinor, |
| 42 | conticuit. nunc adeam optimum est, prius quam incipit tinnire. |
| 43 | quam mox mi operam das? LEON. Ehem, optume. quam dudum tu advenisti? |
| 44 | non hercle te provideram (quaeso, ne vitio vortas), |
| 45 | ita iracundia obstitit oculis. MERC. Non mirum factum est. |
| 46 | sed si domi est, Demaenetum volebam. LEON. Negat esse intus. |
| 47 | verum istuc argentum tamen mihi si vis denumerare, |
| 48 | repromittam istoc nomine solutam rem futuram. |
| 49 | MERC. Sic potius, ut Demaeneto tibi ero praesente reddam. |
| 50 | LIB. Erus istunc novit atque erum hic. MERC. Ero huic praesente reddam. |
| 51 | LIB. Da modo meo periculo, rem salvam ego exhibebo; |
| 52 | nam si sciat noster senex fidem non esse huic habitam, |
| 53 | suscenseat, quoi omnium rerum ipsus semper credit. |
| 54 | LEON. Non magni pendo. ne duit, si non volt. sic sine astet. |
| 55 | LIB. Da, inquam. vah, formido miser, ne hic me tibi arbitretur |
| 56 | suasisse, sibi ne crederes. da, quaeso, ac ne formida: |
| 57 | salvom hercle erit. MERC. Credam fore, dum quidem ipse in manu habebo. |
| 58 | peregrinus ego sum, Sauream non novi. LIB. At nosce sane. |
| 59 | MERC. Sit, non sit, non edepol scio. si is est, eum esse oportet. |
| 60 | ego certe me incerto scio hoc daturum nemini homini. |
| 61 | LEON. Hercle istum di omnes perduint. verbo cave supplicassis. |
| 62 | ferox est viginti minas meas tractare sese. |
| 63 | nemo accipit, aufer te domum, abscede hinc, molestus ne sis. |
| 64 | MERC. Nimis iracunde. non decet superbum esse hominem servom. |
| 65 | LEON. Malo hercle iam magno tuo, ni isti nec recte dicis. |
| 66 | LIB. Impure, nihili. non vides irasci? LEON. Perge porro. |
| 67 | LIB. Flagitium hominis. da, obsecro, argentum huic, ne male loquatur. |
| 68 | MERC. Malum hercle vobis quaeritis. LEON. Crura hercle diffringentur, |
| 69 | ni istum impudicum percies. LIB. Perii hercle. age impudice, |
| 70 | sceleste, non audes mihi scelesto subvenire? |
| 71 | LEON. Pergin precari pessimo? MERC. Quae res? tun libero homini |
| 72 | male servos loquere? LEON. Vapula. MERC. Id quidem tibi hercle fiet, |
| 73 | ut vapules, Demaenetum simul ac conspexero hodie. |
| 74 | [in ius voco te. LEON. Non eo. MERC. Non is? memento. LEON. Memini. |
| 75 | MERC. Dabitur pol supplicium mihi de tergo vostro. LEON. Vae te. |
| 76 | tibi quidem supplicium, carnufex, de nobis detur? MERC. Atque etiam |
| 77 | pro dictis vostris maledicis poenae pendentur mi hodie.] |
| 78 | LEON. Quid, verbero? ain tu, furcifer? |
| 79 | erum nos fugitare censes? |
| 80 | ei nunciam ad erum, quo vocas, iam dudum quo volebas. |
| 81 | MERC. Nunc demum? tamen numquam hinc feres argenti nummum, nisi me |
| 82 | dare iusserit Demaenetus. LEON. Ita facito, age ambula ergo. |
| 83 | tu contumeliam alteri facias, tibi non dicatur? |
| 84 | tam ego homo sum quam tu. MERC. Scilicet. ita res est. LEON. Sequere hac ergo. |
| 85 | praefiscini hoc nunc dixerim: nemo etiam me accusavit |
| 86 | merito meo, neque me alter est Athenis hodie quisquam, |
| 87 | cui credi recte aeque putent. MERC. Fortassis. sed tamen me |
| 88 | numquam hodie induces, ut tibi credam hoc argentum ignoto. |
| 89 | lupus est homo homini, non homo, quom qualis sit non novit. |
| 90 | LEON. Iam nunc secunda mihi facis. scibam huic te capitulo hodie |
| 91 | facturum satis pro iniuria; quamquam ego sum sordidatus, |
| 92 | frugi tamen sum, nec potest peculium enumerari. |
| 93 | MERC. Fortasse. LEON. Etiam nunc dico Periphanes Rhodo mercator dives |
| 94 | absente ero solus mihi talentum argenti soli |
| 95 | adnumeravit et mihi credidit, nequest deceptus in eo. |
| 96 | MERC. Fortasse. LEON. Atque etiam tu quoque ipse, si esses percontatus |
| 97 | me ex aliis, scio pol crederes nunc quod fers. MERC. Haud negassim.? |