Plautus, Asinaria, 1, Scaena I. Libanus Demaenetus
| 1 | LIB. Sicut tuom vis unicum gnatum tuae |
| 2 | superesse vitae sospitem et superstitem, |
| 3 | ita ted obtestor per senectutem tuam |
| 4 | perque illam, quam tu metuis, uxorem tuam, |
| 5 | si quid med erga hodie falsum dixeris, |
| 6 | ut tibi superstes uxor aetatem siet |
| 7 | atque illa viva vivos ut pestem oppetas. |
| 8 | DEM. Per Dium Fidium quaeris: iurato mihi |
| 9 | video necesse esse eloqui quidquid roges. |
| 10 | [ita me obstinate adgressus, ut non audeam |
| 11 | profecto, percontanti quin promam omnia.] |
| 12 | proinde actutum istuc quid sit quod scire expetis |
| 13 | eloquere: ut ipse scibo, te faciam ut scias. |
| 14 | LIB. Dic obsecro hercle serio quod te rogem, |
| 15 | cave mihi mendaci quicquam. DEM. Quin tu ergo rogas? |
| 16 | LIB. Num me illuc ducis, ubi lapis lapidem terit? |
| 17 | DEM. Quid istuc est? aut ubi istuc est terrarum loci? |
| 18 | LIB. [Ubi flent nequam homines, qui polentam pinsitant.] |
| 19 | apud fustitudinas, ferricrepinas insulas, |
| 20 | ubi vivos homines mortui incursant boves. |
| 21 | DEM. Modo pol percepi, Libane, quid istuc sit loci: |
| 22 | ubi fit polenta, te fortasse dicere. LIB. Ah, |
| 23 | neque hercle ego istuc dico nec dictum volo, |
| 24 | teque obsecro hercle ut quae locutus despuas. |
| 25 | DEM. Fiat, geratur mos tibi. LIB. Age, age usque excrea. |
| 26 | DEM. Etiamne? LIB. Age quaeso hercle usque ex penitis faucibus. |
| 27 | etiam amplius. DEM. Nam quo usque? LIB. Usque ad mortem volo. |
| 28 | DEM. Cave sis malam rem. LIB. Uxoris dico, non tuam. |
| 29 | DEM. Dono te ob istuc dictum, |
| 30 | ut expers sis metu. |
| 31 | LIB. Di tibi dent quaecumque optes. DEM. Redde operam mihi. |
| 32 | cur hoc ego ex te quaeram? aut cur miniter tibi |
| 33 | propterea quod me non scientem feceris? |
| 34 | aut cur postremo filio suscenseam, |
| 35 | patres ut faciunt ceteri? LIB. Quid istuc novi est? |
| 36 | demiror quid sit et quo evadat sum in metu. |
| 37 | DEM. Equidem scio iam, filius quod amet meus |
| 38 | istanc meretricem e proxumo Philaenium. |
| 39 | estne hoc ut dico, Libane? LIB. Rectam instas viam. |
| 40 | ea res est. sed eum morbus invasit gravis. |
| 41 | DEM. Quid morbi est? LIB. Quia non suppetunt dictis data. |
| 42 | DEM. Tune es adiutor nunc amanti filio? |
| 43 | LIB. Sum vero, et alter noster est Leonida. |
| 44 | DEM. Bene hercle facitis et a me initis gratiam. |
| 45 | verum meam uxorem, Libane, nescis qualis sit? |
| 46 | LIB. Tu primus sentis, nos tamen in pretio sumus. |
| 47 | DEM. Fateor eam esse importunam atque incommodam. |
| 48 | LIB. Posterius istuc dicis quam credo tibi. |
| 49 | DEM. Omnes parentes, Libane, liberis suis, |
| 50 | qui mi auscultabunt, facient obsequellam |
| 51 | quippe qui mage amico utantur gnato et benevolo. |
| 52 | atque ego me id facere studeo, volo amari a meis; |
| 53 | volo me patris mei similem, qui causa mea |
| 54 | nauclerico ipse ornatu per fallaciam |
| 55 | quam amabam abduxit ab lenone mulierem; |
| 56 | neque puduit eum id aetatis sycophantias |
| 57 | struere et beneficiis me emere gnatum suom sibi. |
| 58 | eos me decretumst persequi mores patris. |
| 59 | nam me hodie oravit Argyrippus filius, |
| 60 | uti sibi amanti facerem argenti copiam; |
| 61 | et id ego percupio obsequi gnato meo. |
| 62 | [volo amori obsecutum illius, volo amet me patrem.] |
| 63 | quamquam illum mater arte contenteque habet, |
| 64 | patres ut consueverunt: ego mitto omnia haec. |
| 65 | praesertim quom is me dignum quoi concrederet |
| 66 | habuit, me habere honorem eius ingenio decet; |
| 67 | quom me adiit, ut pudentem gnatum aequomst patrem, |
| 68 | cupio esse amicae quod det argentum suae. |
| 69 | LIB. Cupis id quod cupere te nequiquam intellego. |
| 70 | dotalem servom Sauream uxor tua |
| 71 | adduxit, cui plus in manu sit quam tibi. |
| 72 | DEM. Argentum accepi, dote imperium vendidi. |
| 73 | nunc verba in pauca conferam quid te velim. |
| 74 | viginti iam usust filio argenti minis: |
| 75 | face id ut paratum iam sit. LIB. Unde gentium? |
| 76 | DEM. Me defraudato. LIB. Maxumas nugas agis: |
| 77 | nudo detrahere vestimenta me iubes. |
| 78 | defraudem te ego? age sis, tu sine pennis vola. |
| 79 | tene ego defraudem, cui ipsi nihil est in manu, |
| 80 | nisi quid tu porro uxorem defraudaveris? |
| 81 | DEM. Qua me, qua uxorem, qua tu servom Sauream |
| 82 | potes, circumduce, aufer; promitto tibi |
| 83 | non offuturum, si id hodie effeceris. |
| 84 | LIB. Iubeas una opera me piscari in aere, |
| 85 | venari autem rete iaculo in medio mari. |
| 86 | DEM. Tibi optionem sumito Leonidam, |
| 87 | fabricare quidvis, quidvis comminiscere: |
| 88 | perficito, argentum hodie ut habeat filius, |
| 89 | amicae quod det. LIB. Quid ais tu, Demaenete? |
| 90 | DEM. Quid <vis>? LIB. Si forte in insidias devenero, |
| 91 | tun redimes me, si me hostes interceperint? |
| 92 | DEM. Redimam. LIB. Tum tu igitur aliud cura quid lubet. |
| 93 | ego eo ad forum, nisi quid vis. DEM. Ei, bene ambula. |
| 94 | atque audin etiam? LIB. Ecce. DEM. Si quid te volam, |
| 95 | ubi eris? LIB. Ubicumque libitum erit animo meo. |
| 96 | profecto nemo est quem iam dehinc metuam mihi |
| 97 | ne quid nocere possit, cum tu mihi tua |
| 98 | oratione omnem animum ostendisti tuom. |
| 99 | quin te quoque ipsum facio haud magni, si hoc patro. |
| 100 | pergam quo occepi atque ibi consilia exordiar. |
| 101 | DEM. Audin tu? apud Archibulum ego ero argentarium. |
| 102 | LIB. Nempe in foro? DEM. Ibi, si quid opus fuerit. LIB. Meminero. - |
| 103 | DEM. Non esse servos peior hoc quisquam potest |
| 104 | nec magis versutus nec quo ab caveas aegrius. |
| 105 | eidem homini, si quid recte curatum velis, |
| 106 | mandes: moriri sese misere mavolet, |
| 107 | quam non perfectum reddat quod promiserit. |
| 108 | nam ego illud argentum tam paratum filio |
| 109 | scio esse quam me hunc scipionem contui. |
| 110 | sed quid ego cesso ire ad forum, quo inceperam? |
| 111 | *** atque ibi manebo apud argentarium. - |