Petrus Venerabilis, Epistulae, 7, EPISTULA III. [Epistula Petri abbatis Cluniacensis ad Diethelmum presbyterum.---Monasterium de Thierbach dioecesis Basileensis ordini Cluniacensi aggregat.] (Anno 1142.) [MARTENE [Thes. Anecdot.,] I, 395.]
| 1 | Venerabili presbytero domno DIETHELMO, et omnibus in parochia de Sultza commorantibus, frater PETRUS Cluniacensis abbas, salutem. |
| 2 | Quando primo novam plantationem de Thierbach inchoastis, et in subiectionem esse Cluniaci destinastis, vos ipsos omnium fratrum Cluniacensium orationibus incorporastis. Quocirca nos eumdem locum ulterius permanere in dominio Cluniaci praedicti privilegio stabilimus, et nulli alteri ecclesiae subiacere, nec aliud contra privilegium valere praecipimus. |
| 3 | Omnes ergo eodem loco bona facientes, nos participes omnium bonorum omnium fratrum Cluniacensium constituimus, et confratres nostros facimus, et in morte et in vita pro eis orare decernimus, ut Deus eos ab omnibus peccatis absolvat. Amen. |
| 4 | Datum Cluniaci anno millesimo centesimo quadragesimo secundo, tertio Nonas Martii. |