| 1 | Materiam scribendi non habeo, sed ad semper scribendum magna mihi estis ipse materia. Unde si plus iusto forte frequentibus epistulis vos inquieto, mirum videri non debet, cum et amor verbosus tacere nesciat, et inexhausta loquendi materia deficere prorsus ignoret. Satisfacio, ut possum, hac arte desiderio meo, ut cui quotidie, si facultas daretur, praesens, colloqui vellem, nuntiis vel sponte quaesitis, vel casu inventis, quod implere non valeo, recompensem. |
| 2 | Inde est quod per istum fratrem nostrum monachum vestrum aliquid scribere volui, cum nullam, ut dixi, materiam haberem scribendi. Erit vestrum amodo in necessariis non silere, cum videatis me multo vestro amore impulsum, in superfluis non posse tacere. |