Persius, Saturae, Satura VI
| 1 | Admovit iam bruma foco te Basse Sabino |
| 2 | iamne lyra et tetrico vivunt tibi pectine chordae |
| 3 | mire opifex numeris veterum primordia vocum |
| 4 | atque marem strepitum fidis intendisse Latinae |
| 5 | mox iuvenes agitare iocos et pollice honesto |
| 6 | egregius lusisse senex mihi nunc Ligus ora |
| 7 | intepet hibernatque meum mare qua latus ingens |
| 8 | dant scopuli et multa litus se valle receptat |
| 9 | Lunai portum est operae cognoscite cives |
| 10 | cor iubet hoc Enni postquam destertuit esse |
| 11 | Maeonides Quintus pavone ex Pythagoreo |
| 12 | hic ego securus volgi et quid praeparet auster |
| 13 | infelix pecori securus et angulus ille |
| 14 | vicini nostro quia pinguior etsi adeo omnes |
| 15 | ditescant orti peioribus usque recusem |
| 16 | curvus ob id minui senio aut cenare sine uncto |
| 17 | et signum in vapida naso tetigisse lagoena |
| 18 | discrepet his alius geminos horoscope varo |
| 19 | producis genio: solis natalibus est qui |
| 20 | tinguat holus siccum muria vafer in calice empta |
| 21 | ipse sacrum inrorans patinae piper hic bona dente |
| 22 | grandia magnanimus peragit puer utar ego utar |
| 23 | nec rhombos ideo libertis ponere lautus |
| 24 | nec tenuis sollers turdarum nosse salivas |
| 25 | messe tenus propria vive et granaria fas est |
| 26 | emole quid metuas occa et seges altera in herba est |
| 27 | at vocat officium trabe rupta Bruttia saxa |
| 28 | prendit amicus inops remque omnem surdaque vota |
| 29 | condidit Ionio iacet ipse in litore et una |
| 30 | ingentes de puppe dei iamque obvia mergis |
| 31 | costa ratis lacerae nunc et de caespite vivo |
| 32 | frange aliquid largire inopi ne pictus oberret |
| 33 | caerulea in tabula sed cenam funeris heres |
| 34 | negleget iratus quod rem curtaveris urnae |
| 35 | ossa inodora dabit seu spirent cinnama surdum |
| 36 | seu ceraso peccent casiae nescire paratus |
| 37 | tune bona incolumis minuas et Bestius urguet |
| 38 | doctores Graios: ita fit postquam sapere urbi |
| 39 | cum pipere et palmis venit nostrum hoc maris expers |
| 40 | fenisecae crasso vitiarunt unguine pultes |
| 41 | haec cinere ulterior metuas at tu meus heres |
| 42 | quisquis eris paulum a turba seductior audi |
| 43 | o bone num ignoras missa est a Caesare laurus |
| 44 | insignem ob cladem Germanae pubis et aris |
| 45 | frigidus excutitur cinis ac iam postibus arma |
| 46 | iam chlamydas regum iam lutea gausapa captis |
| 47 | essedaque ingentesque locat Caesonia Rhenos |
| 48 | dis igitur genioque ducis centum paria ob res |
| 49 | egregie gestas induco quis vetat aude |
| 50 | vae nisi conives oleum artocreasque popello |
| 51 | largior an prohibes dic clare non adeo inquis |
| 52 | exossatus ager iuxta est age si mihi nulla |
| 53 | iam reliqua ex amitis patruelis nulla proneptis |
| 54 | nulla manet patrui sterilis matertera vixit |
| 55 | deque avia nihilum superest accedo Bovillas |
| 56 | clivumque ad Virbi praesto est mihi Manius heres |
| 57 | progenies terrae quaere ex me quis mihi quartus |
| 58 | sit pater: haut prompte dicam tamen adde etiam unum |
| 59 | unum etiam: terrae est iam filius et mihi ritu |
| 60 | Manius hic generis prope maior avunculus exit |
| 61 | qui prior es cur me in decursu lampada poscis |
| 62 | sum tibi Mercurius venio deus huc ego ut ille |
| 63 | pingitur an renuis vis tu gaudere relictis |
| 64 | dest aliquid summae minui mihi sed tibi totum est |
| 65 | quidquid id est ubi sit fuge quaerere quod mihi quondam |
| 66 | legarat Tadius neu dicta pone paterna |
| 67 | fenoris accedat merces hinc exime sumptus |
| 68 | quid relicum est relicum nunc nunc inpensius ungue |
| 69 | ungue puer caules mihi festa luce coquatur |
| 70 | urtica et fissa fumosum sinciput aure |
| 71 | ut tuus iste nepos olim satur anseris extis |
| 72 | cum morosa vago singultiet inguine vena |
| 73 | patriciae inmeiat volvae mihi trama figurae |
| 74 | sit reliqua ast illi tremat omento popa venter |
| 75 | Vende animam lucro mercare atque excute sollers |
| 76 | omne latus mundi ne sit praestantior alter |
| 77 | Cappadocas rigida pinguis plausisse catasta |
| 78 | rem duplica feci iam triplex iam mihi quarto |
| 79 | iam decies redit in rugam depunge ubi sistam |
| 80 | inventus Chrysippe tui finitor acervi. |