Ovidius, Amores, 1, V
| 1 | Aestus erat, mediamque dies exegerat horam; |
| 2 | adposui medio membra levanda toro. |
| 3 | pars adaperta fuit, pars altera clausa fenestrae; |
| 4 | quale fere silvae lumen habere solent, |
| 5 | qualia sublucent fugiente crepuscula Phoebo, |
| 6 | aut ubi nox abiit, nec tamen orta dies. |
| 7 | illa verecundis lux est praebenda puellis, |
| 8 | qua timidus latebras speret habere pudor. |
| 9 | ecce, Corinna venit, tunica velata recincta, |
| 10 | candida dividua colla tegente coma - |
| 11 | qualiter in thalamos famosa Semiramis isse |
| 12 | dicitur, et multis Lais amata viris. |
| 13 | Deripui tunicam - nec multum rara nocebat; |
| 14 | pugnabat tunica sed tamen illa tegi. |
| 15 | quae cum ita pugnaret, tamquam quae vincere nollet, |
| 16 | victa est non aegre proditione sua. |
| 17 | ut stetit ante oculos posito velamine nostros, |
| 18 | in toto nusquam corpore menda fuit. |
| 19 | quos umeros, quales vidi tetigique lacertos! |
| 20 | forma papillarum quam fuit apta premi! |
| 21 | quam castigato planus sub pectore venter! |
| 22 | quantum et quale latus! quam iuvenale femur! |
| 23 | Singula quid referam? nil non laudabile vidi |
| 24 | et nudam pressi corpus ad usque meum. |
| 25 | Cetera quis nescit? lassi requievimus ambo. |
| 26 | proveniant medii sic mihi saepe dies! |