Notkerus Balbulus, Sequentiae, CAP XIX. In Assumptione sanctae Mariae.
| 1 | Congaudent angelorum |
| 2 | Chori gloriosae Virgini, |
| 3 | Quae sine virili commistione genuit |
| 4 | Filium qui suo mundum cruore medicat. |
| 5 | Nam ipsa laetatur quo coeli iam |
| 6 | Conspicatur principem, |
| 7 | In terris cui quondam sugendas |
| 8 | Virgo mamillas praebuit. |
| 9 | Quam celebris angelis Maria, |
| 10 | Iesu Mater creditur, |
| 11 | Qui Filii illius debitos. |
| 12 | Se cognoscunt famulos! |
| 13 | Qua gloria in coelis ista Virgo colitur, |
| 14 | Quae Domino coeli praebuit hospitium |
| 15 | Sui sanctissimi corporis |
| 16 | Quam splendida polo |
| 17 | Stella maris rutilat, |
| 18 | Quae omnium lumen astrorum, |
| 19 | Et hominum atque spirituum genuit! |
| 20 | Te, coeli Regina, haec plebecula |
| 21 | Piis concelebrat mentibus. |
| 22 | Te cantu melodo super aethera |
| 23 | Una cum angelis elevat. |
| 24 | Te libri, Virgo, concinunt |
| 25 | Prophetarum, chorus iubilat |
| 26 | Sacerdotum, apostoli, Christique |
| 27 | Martyres praedicant. |
| 28 | Te plebes sexus sequitur utriusque, |
| 29 | Vitam diligens virginalem, |
| 30 | Coelicolas in castimonia aemulans. |
| 31 | Ecclesia ergo cuncta te cordibus, |
| 32 | Teque carminibus celebrans, |
| 33 | Tibi suam manifestat devotionem, |
| 34 | Precatu te supplici implorans, Maria: |
| 35 | Ut sibi auxilio circa Christum Dominum |
| 36 | Esse digneris per aevum. |