Notkerus Balbulus, Sequentiae, CAP IX. In die sancto Paschae.
| 1 | Laudes Salvatoris voce modulemur supplici |
| 2 | Et devotis melodiis coelesti |
| 3 | Domino iubilemus Messiae, |
| 4 | Qui se ipsum exinanivit ut nos |
| 5 | Perditos liberaret homines. |
| 6 | Carne gloriam deitatis occulens |
| 7 | Pannis tegitur in praesepi, miserans |
| 8 | Praecepti transgressorem pulsum |
| 9 | Patria paradisi nudulum. |
| 10 | Ioseph, Mariae, Simeoni subditur, |
| 11 | Circumciditur et legali hostia |
| 12 | Mundatur, ut peccator, nostra |
| 13 | Qui solet relaxare crimina. |
| 14 | Servi subiit manus baptizandus |
| 15 | Et perfert fraudes tentatoris, |
| 16 | Fugit persequentum lapides. |
| 17 | Famem patitur, dormit, et tristatur |
| 18 | Ac lavat discipulis pedes, |
| 19 | Deus homo, summus humilis. |
| 20 | Sed tamen inter haec abiecta corporis |
| 21 | Eius deitas nequaquam |
| 22 | Quivit latere signis variis |
| 23 | Et doctrinis prodita: |
| 24 | Aquam nuptiis dat saporis vinei; |
| 25 | Caecos oculos claro lumine |
| 26 | Vestivit; lepram luridam |
| 27 | Tactu fugat placido; |
| 28 | Putres suscitat mortuos |
| 29 | Membraque curat debilia; |
| 30 | Fluxum sanguinis constrinxit |
| 31 | Et saturavit quinque de panibus |
| 32 | Quina millia; |
| 33 | Stagnum peragrat fluctuans, ceu |
| 34 | Siccum littus ventos sedat; |
| 35 | Linguam reserat constrictam; |
| 36 | Reclusit aures privatas |
| 37 | Vocibus; febres depulit. |
| 38 | Post haec mira miracula taliaque |
| 39 | Sponte sua comprehenditur, et damnatur |
| 40 | Et se crucifigi non despexit; |
| 41 | Sed sol eius mortem non aspexit. |
| 42 | Illuxit dies, quam fecit Dominus, |
| 43 | Mortem devastans et victor suis |
| 44 | Apparens dilectoribus vivus |
| 45 | Primo Mariae, dehinc apostolis, |
| 46 | Docens Scripturas, cor aperiens |
| 47 | Ut clausa de ipso reserarent. |
| 48 | Favent igitur resurgenti |
| 49 | Christo cuncta gaudiis, |
| 50 | Flores, segetes redivivo fructu |
| 51 | Vernant, et volucres gelu tristi |
| 52 | Terso dulce iubilant. |
| 53 | Lucent clarius sol et luna |
| 54 | Morte Christi turbida. |
| 55 | Tellus herbida resurgenti |
| 56 | Plaudit Christo quae tremula eius |
| 57 | Morte se casuram minitat. |
| 58 | Ergo die ista exsultemus, qua nobis |
| 59 | Viam vitae resurgens patefecit Iesus. |
| 60 | Astra, solum, mare iucundentur, |
| 61 | Et cuncti gratulentur in coelis |
| 62 | Spiritales chori Trinitati. |