Notkerus Balbulus, Sequentiae, CAP III. In Natale Domini.
| 1 | Natus ante saecula Dei Filius, |
| 2 | Invisibilis, interminus |
| 3 | Per quem fit machina coeli, ac terrae, |
| 4 | Maris et in his degentium; |
| 5 | Per quem dies et horae labant |
| 6 | Et se iterum reciprocant; |
| 7 | Quem angeli in arce poli |
| 8 | Voce consona semper canunt |
| 9 | Hic corpus assumpserat fragile |
| 10 | Sine labe originalis criminis |
| 11 | De carne Mariae Virginis, |
| 12 | Quo primi parentis culpam |
| 13 | Evaeque lasciviam tergeret. |
| 14 | Hoc praesens diecula loquitur, |
| 15 | Praelucida, adaucta longitudine, |
| 16 | Quod sol verus radio sui luminis |
| 17 | Vetustas mundi depulerit |
| 18 | Genitus tenebras. |
| 19 | Nec nox vacat novi sideris |
| 20 | Luce quod magorum |
| 21 | Oculos terruit scios. |
| 22 | Nec gregum magistris defuit |
| 23 | Lumen, quos praestrinxit |
| 24 | Claritas militum Dei. |
| 25 | Gaude, Dei Genitrix, quam |
| 26 | Circumstant obstetricum vice |
| 27 | Concinentes angeli gloriam Deo. |
| 28 | Christe, Patris unice, qui humanam |
| 29 | Nostri causa formam assumpsisti, |
| 30 | Refove supplices tuos: |
| 31 | Et quorum participem te fore |
| 32 | Dignatus es, Iesu, dignanter |
| 33 | Eorum suscipe preces, |
| 34 | Ut ipsos divinitatis tuae |
| 35 | Participes, Deus, facere |
| 36 | Digneris, unice Dei. |