| 1 | Apud Tharsum, metropolim Ciliciae, natalis Tharaci presbyteri [Probi] et Andronici martyrum. Qui Diocletiani persecutione sub Maximo praeside carcere puniti, nervis caesi, testis defricati, ardente papyro adusti, maxillarum fracturam et tibiarum tormenta perpessi, aceti et sinapis in naribus infusione cruciati, post obeliscos ignitos, post confixos clavis acutissimis digitos, post oculorum transpunctionem linguaeque abscissionem, ursis et leonibus proiecti sunt. Sed cum a nulla bestiarum laederentur, gladio iugulati, inter corpora interfectorum proiici iubentur. Ubi noctu velut stella splendida de coelo demissa super corpora sanctorum Christianis revelati sunt, et eiusdem ducatu stellae, sepulturae traduntur. |